છકડો રીક્ષા VS કાર: નાકિયા છકડામાં, બાવળિયા કારમાં મતદાન કરવા પહોંચ્યા

ન્યૂઝ18 ગુજરાતીઃ જસદણમાં આજે કોંગ્રેસ અને ભાજપના ઉમેદવારના ભાવી ઈવીએમમાં સીલ થઈ જશે. આ માટે સવારે 8 વાગ્યે મતદાન શરૂ થયું હતું. વહેલી સવારથી જ લોકો મતદાન કરવા માટે પહોંચી ગયા હતા. કોંગ્રેસ અને ભાજપના ઉમેદવારોએ પણ પરિવાર સાથે સવારે જ મતદાન કર્યું હતું. કોંગ્રેસના ઉમેદવાર અવસર નાકિયાએ સૌપ્રથમ મતદાન કર્યું હતું. તેઓ છકડો રીક્ષા લઈને જ મતદાન કરવા માટે આવી પહોંચ્યા હતા. તો ભાજપના ઉમેદવાર કુંવરજી બાવળિયા મતદાન કરવા માટે કાર લઈને આવી પહોંચ્યા હતા.

કોંગ્રેસના ઉમેદવાર અવસર નાકિયાએ સવારે મતદાન માટે નીકળા પહેલા પોતાના ઘરે મંદિરમાં માતાજીના દર્શન કર્યા હતા. તેમના ઘરે ખૂબ જ સાદગી જોવા મળી હતી. ઘરે તેમના પરિવાર તરફથી હાજર તમામ લોકોને ચા બનાવીને પીવડાવવામાં આવી હતી. આ પ્રસંગે અવસર નાકિયાએ કહ્યુ હતુ કે, "મને વિશ્વાસ છે કે આ કોંગ્રેસની બેઠક હતી અને જળવાઈ રહેશે. તમામ સમાજના લોકો અમને જીતાડશે. અમે 105 ગામ અને જસદણ શહેરમાં પ્રચાર કર્યો છે. આ બેઠક કોંગ્રેસનો ગઢ હતી અને રહેશે."

મતદાન માટે નીકળતા પહેલા અવસર નાકિયાના પરિવારજનોએ પણ તેમની જીત માટેનો આશાવાદ વ્યક્ત કર્યો હતો. તેમના પત્ની અને દીકરીઓએ કહ્યુ હતું કે, જીત માટે તેમણે તેમના કુળદેવી અન પિતૃદેવને ખાસ પ્રાર્થના કરી છે.

માતાજીના દર્શન કર્યા બાદ અવસર નાકિયા પોતાના ઘરેથી છકડો રીક્ષા લઈને જ મતદાન કરવા માટે નીકળ્યા હતા. નોંધનીય છે કે અવસર નાકિયા ખૂબ જ સામાન્ય પરિવારમાંથી આવે છે, તેમજ છકડો રીક્ષા ચલાવીને પોતાનું ગુજરાતન ચલાવે છે. તેઓ જેમની સાથે ચૂંટણી લડી રહ્યા છે તે કુંવરજી બાવળિયાએ જ તેમને રાજકારણના પાઠ શીખવ્યા છે.

જનડા ખાતેથી તેઓ કારમાં સવાર થઈને મતદાન કરવા માટે પહોંચ્યા હતા. આ પહેલા તેમણે મીડિયા સાથે વાતચીત કરતા જસદણની બેઠક પર મોટી જીત મેળવશે તેવું જણાવ્યું હતું. તેમણે કહ્યું હતું કે મારી માતા તેમજ મારા કુળદેવીના આશીર્વાદથી હું કેબિનેટ મંત્રી સુધી પહોંચ્યો છું.<span style="color: #2b2b2b;font-size: 16px"> </span>

મતદાન બાદ કુંવરજી બાવળિયાએ જણાવ્યું હતું કે, "મેં મારા મતના અધિકારનો ઉપયોગ કર્યો છે. આજનું મતદાન અભૂતપૂર્વ બની રહેશે. આઝાદીના આટલા વર્ષો પછી આ વિસ્તારના કોઈ વ્યક્તિને કેબિનેટનું સ્થાન મળ્યું છે. આ તમામ વાત ધ્યાનમાં રાખીને આ વિસ્તારના લોકો મતદાન કરવાના છે."

મતદાન બાદ અવસર નાકિયાએ કહ્યું કે, "મેં જ્યારે જેને મત આપ્યો છે તે ઉમેદવાર વિજેતા થયો છે. આજે મેં મને જ મત આપ્યો છે એટલે મારી જીત નક્કી છે. મારા આત્મા એવું કહે છે કે અમારી જીત નક્કી છે."