રાજકોટ : આમ તો પોલીસને તમામ લોકો શંકા અને નકારાત્મક નજરથી જ જોતા હોય છે, પરંતુ પોલીસ સાચા અર્થમાં પ્રજાની રક્ષક છે તેવા અનેક દ્રશ્યો આ કપરા સમયમાં આખા રાજ્યમાં જોવા મળે છે. એક તરફ સમગ્ર વિશ્વમાં કોરોના વાયરસની મહામારી ચાલી રહી છે ત્યારે પ્રધાનમંત્રી નરેન્દ્ર મોદીએ સમગ્ર ભારતમાં લૉકડાઉન જાહેર કર્યું છે. શુક્રવારે લૉકડાઉનનો 17મો દિવસ છે. આ સમયે રાજકોટથી 30 કિલોમીટર દૂર બામણબોર ચેકપોસ્ટ પર ખાખીની સેવાના કેટલાક આંખ ભીની કરતા દ્રશ્યો કેમેરામાં કેદ થયા છે.
લૉકડાઉનનું યોગ્ય પાલન થાય અને લોકો બિનજરૂરી ઘરની બહાર ન નીકળે તે માટે પોલીસ દ્વારા 24 કલાક સતત ખડેપગે રહી ફરજ બજાવવામાં આવી રહી છે. શહેર ઉપરાંત હાઇવે ઉપર પણ સતત 24 કલાક પોલીસ ફરજ બજાવી રહી છે. રાજકોટ અમદાવાદ હાઇવે પર રાજકોટથી 30 કિલોમીટર દૂર બામણબોર ચેકપોસ્ટ ખાતે અનેક કરુણતા ભર્યા દ્રશ્યો જોવા મળે છે.
અહીં સતત 24 કલાક પોલીસ ફરજ પર જોવા મળે છે. બપોરે જમવાનાસમયે પણ પોલીસ પોતાના ઘરે નથી જઇ શકતી. તેઓ પોલીસ ચેક પોસ્ટ ખાતે જાતે જ જમવાનું બનાવીને જમે છે.
ચેકપોસ્ટ પર પોલીસ 24 કલાક 2 શિફ્ટમાં કામ કરે છે. જેમાં એક PSI સહિત SRP, હોમગાર્ડ, ટ્રાફિક બ્રિગેડ સહિત 25 લોકો ફરજ બજાવે છે. આ તમામ લોકો જાતે જ જમવાનું બનાવીને મે છે.
આ વાત જાણીને ખરેખર ગુજરાતની ખાખીને સલામ કરવાનું મન થાય. પોલીસ ફરજ પર રહી રાષ્ટ્ર સેવા કરવાની સાથે સાથે લોકોને લૉકડાઉનના નિયમ પાળવા તેમજ ઘરે જ રહેવા માટે અપીલ કરી રહી છે.
