અનલોકમાં બૂટલેગરો બેફામ! ગોંડલમાં દારૂની કટિંગ વખતે જ પોલીસ ત્રાટકી, વોન્ટેડની ધરપકડ

ગોંડલઃ કોરોના વાયરસના (coronavirus) સંક્રમણથી બચવા માટે સમગ્ર દેશમાં લોકડાઉન (lockdown) કરવામાં આવ્યું હતું. ત્યારબાદ અનલોક વન મુજબ ધીમે ધીમે તમામ ધંધા રોજગારો ફરીથી શરૂ કરવા માટેની છૂટછાટ આપવામાં આવી હતી. લોકડાઉન દરમિયાન દારૂના વ્યસનીઓ માટે દારૂની (liquor) હેરાફેરી થઈ શકતી ન હતી. જોકે હવે અનલોક વનમાં બૂટલેગરો (Bootlegger) બેફામ બન્યા હોય તેવા કિસ્સાઓ સામે આવી રહ્યા છે. (હરિન માત્રાવાડિયા, રાજકોટ)

રાજકોટ શહેર તેમજ જિલ્લામાં પોલીસ દ્વારા અલગ અલગ જગ્યાઓ પરથી દારૂના હેરાફેરી કરતા લોકો તેમજ દારૂના મસમોટો જથ્થો પણ પકડી પાડવામાં આવી રહ્યો છે. ત્યારે રાજકોટ જિલ્લાની ગોંડલ પોલીસને પણ એક મોટી સફળતા હાથ લાગી છે.

ગોંડલના વોરાકોટડા રોડ પરથી પોલીસે મોટી માત્રામાં દારૂનો જથ્થો કબ્જે કર્યો છે. વોરાકોટડા રોડ પર દારૂના કટીંગ સમયે જ પોલીસ પહોંચી હતી અને લાખો રૂપિયાનો મુદ્દામાલ કબજે કર્યો હતો.

પોલીસે ઈરફાન ઉર્ફે ઈકુ કટારીયાને ત્યાં દરોડો પાડી 1164 જેટલી વિદેશી દારૂની બોટલો કુલ ત્રણ લાખથી વધુની કિંમતનો દારૂનો જથ્થો ઝડપી પાડયો હતો.

તો સાથે જ ઇકો કાર અને ટ્રક મળી કુલ 16 લાખથી વધુનો મુદ્દામાલ પોલીસે કબજે કરી આગળની કાર્યવાહી હાથ ધરી હતી.

પોલીસે જે આરોપીની ધરપકડ કરી છે તે અગાવ પણ પોલીસ ચોપડે ચડી ચુક્યો છે અને શાપરમાં પણ વોન્ટેડ છે.

ગોંડલ પોલીસે હવે દારૂનો જથ્થો ક્યાંથી આવ્યો અને અન્ય કોઈ આરોપી સંડોવાયેલા છે કે કેમ તેની તપાસ હાથ ધરી છે તો સાથે જ ફરાર રાજસ્થાનના ટ્રક ડ્રાઈવરની શોધખોળ પણ હાથ ધરવામાં આવી છે.