રાજકોટઃ સતત બીજા દિવસે ત્યજી દેવાયેલું તાજું જન્મેલું બાળક મળી આવ્યું

રાજકોટ જિલ્લામાં સતત બીજા દિવસે તાજા જન્મેલા બાળકને ત્યજી દેવાની ઘટના સામે આવી છે. સોમવારે ધોરાજીના ભોલા ગામના પુલ નીચેથી ત્યજી દેવાયેલું બાળક મળી આવ્યું હતું. આજે ગોંડલ તાલુકાના એક ગામમાં આવો જ બનાવ સામે આવ્યો છે. (હરિન માત્રાવાડિયા, રાજકોટ)

ગોંડલના બીલયાળા ગામ નજીક ત્યજી દેવાયેલું તાજું જન્મેલું બાળક મળી આવ્યું છે. આ અંગે જાણ થતાં લોકોનાં ટોળે ટોળાં ઉમટી પડ્યા હતા. આ અંગે પોલીસને જાણ કરવામાં આવી હતી. પોલીસે સ્થળ પર પહોંચીને વધુ તપાસ હાથ ધરી છે.

રાજકોટ-ગોંડલ નેશનલ હાઇવે પર બીલયાળા ગામ નજીક હાઇવેની બાજુમાં જ કોઈએ બાળકને ધાબળામાં લપેટીને ત્યાજી દીધું હતું. ત્યજી દેવાયેલું નવજાત છોકરો હોવાનું માલુમ પડ્યું છે.

સોમવારે ધોરાજીના ભોલા ગામના પુલ નજીક જે નવજાત મળી આવ્યું હતું તે એક બાળકી હતી. સતત બીજા દિવસે રાજકોટ જિલ્લામાં આવો બનાવ સામે આવતા ચકચાર મચી જવા પામી છે. આવી ઘટના સમાજ માટે લાલ બત્તી સમાન છે.

બીલયાળા ખાતે મળેલું બાળક કોઈએ પોતાનું પાપ છૂપાવવા ત્યજી દીધું છે કે પછી મૃત બાળકનો જન્મ થયા બાદ ત્વજી દેવામાં આવ્યું છે તેની તપાસ પોલીસે શરૂ કરી છે. પરંતુ જે રીતે બાળકને ધાબળામાં વ્યવસ્થિત રીતે લપેટીને ત્યજી દેવાયું છે તેના પરથી લાગી રહ્યું છે કે કોઈએ પોતાનું પાપ છૂપાવવા અથવા બાળકને કોઈને આશરો મળી જશે તેવા આશયથી જીવિત હાલતમાં જ ત્યજી દીધું હોઈ શકે છે.