મોરબી : 44 લાખ રૂપિયાની કિંમતનો 975 પેટી દારૂ ઝડપાયો, હેરફેરની વધુ એક ટેકનિકનો પર્દાફાશ
મોરબી એલસીબીએ વાંકાનેર બાઉન્ડ્રી નજીકથી એલપીજી ગેસના કન્ટેનરમાં લઇ જવામાં આવતો 44,23,869ની કિંમતનો 975 પેટી વિદેશી દારૂનો જથ્થો પકડી પાડ્યો , સતત બીજા દિવસે મોટી કાર્યવાહી
અતુલ જોશી, મોરબી : વાંકાનેર બાઉન્ડ્રી પાસેથી આજે સતત બીજા દિવસે દારૂ ભરેલું ટેન્કર ઝડપાયું હતું.જેમાં ગઈકાલ આર આર સેલની ટીમે ગઈકાલે ડાક પાર્સલની આડમાં રાજકોટ લઈ જવાતો વિદેશી દારૂનો જથ્થો પકડી પાડ્યો હતો જેને હજુ 24 કલાક પુરી નથી થઈ એ પહેલાં જ વધુ એક દારૂ ભરેલું ટેન્કર પકડાયુ હતું. એક સપ્તાહમાં જુદા જુદા ત્રણ દરોડામાં એક કોરોડનો દારૂ વાંકાનેર પંથકમાંથી પકડાયો
મોરબી એસપી એસ.આર.ઓડેદરા અને ડીવાયએસપી રાધિકા ભારાઈની સૂચનાથી એલસીબી પીઆઈ વી બી જાડેજા અને પીએસઆઇ એન બી ડાભીની ટીમને દારુ ભરેલું ટેન્કર વાંકાનેર બાઉન્ડ્રી નજીકથી પસાર થવાનું હોવાની માહિતી મળી હતી જેના આધારે એલસીબી ટિમેં વોચ ગોઠવતા વાંકાનેર બાઉન્ડ્રી નજીકથી ભારતીય પેટ્રોલિયમ લખેલા એલપીજીનું શંકાસ્પદ કન્ટેનર ઉભું રખાવી ચેક કરતાં ટેન્કરમાં છુપાવીને લઈ જવામાં આવતા દારૂના જથ્થાનો પર્દાફાશ થયો હતો .
એલસીબી પોલીસે ટેન્કરમાંથી રોયલ ચેલેન્જ બોટલ ન.2088 કિંમત રૂપિયા 10,85,760/- , મેકડોવેલ્સ ન.૧ ની 6060 બોટલ કિંમત રૂપિયા 22,72,500/- ,એપિસોડ બોટલ નંગ 3552 કીમત રૂપિયા 10,65,600/- મળી કુલ 44,23,860 ની કિંમતનો 975 પેટી માં 11700 બોટલ વિદેશી દારૂ અને ટેન્કર,મોબાઈલ અને રોકડા 1900 રૂપિયા મળી કુલ રૂપિયા 64,30,760ની કિંમતનો મુદામાલ જપ્ત કરી વાંકાનેર તાલુકા પોલીસ મથકે ગુનો નોંધ્યો છે.
આ મુદામાલ કોને આપવાનો હતો અને કોના દ્વારા મંગાવવામાં આવ્યો હતો તેની તપાસ હાથ ધરી છે.ઉલ્લેખનીય છે કે મોરબી જીલ્લામાં છેલ્લા એક અઠવાડિયામાં સૌરાષ્ટ્રમાં ઘુસાડવામાં આવતો એક કરોડની કિંમતનો વિદેશી દારૂ જુદા જુદા ત્રણ દરોડા દરમ્યાન પકડી પાડ્યો છે ત્યારે મહારાષ્ટ્ર, હરિયાણા અને રાજસ્થાન થી મોરબી અને સૌરાષ્ટ્ર ની હદ સુધી આવડો મોટો વિદેશી દારૂનો જથ્થો પહોંચી જાય છે એમ છતાં અન્ય જીલ્લાની પોલીસ દ્વારા કેમ પકડાતો નથી એ પણ મોટા સવાલો છે.
