મોરબીઃ વાંકાનેર પેપરમીલમાં ભીષણ આગ, આજુબાજુના ફાયર ફાયટર ઘટના સ્થળે

અતુલ જોશી, મોરબીઃ મોરબી જિલ્લાના (morbi news) વાંકાનેરમાં આવેલી પેપરમીલમાં (Big fire in papermill) ભીષણ આગની ઘટના સામે આવી હતી. અહીં શુક્રવારે સાંજના સમયે કોઈ કારણસર આગ લાગી હતી. આગે જોતજોતામાં વિકરાળ સ્વરૂપ ધારણ કરી લીધું હતું. આગના સ્વરૂપ જોઈને આજુ બાજુના ફાયર ફાયટરોને (fire fighter) ઘટના સ્થળે બોલાવી લેવાયા હતા. મેજર કોલ (Major call) જાહેર કરીને ફાયરે આગ ઉપર કાબુ મેળવવાની કામગીરી શરુ કરી દીધી હતી. આગમાં કોઈ જાનહાની થઈ નથી.

મળતી માહિતી પ્રમાણે મોરબી જિલ્લાના વાંકાનેર તાલુકાના રાતાવીરડા નજીક દિયાન પેપરમીલ આવેલી છે. જેમાં શુક્રવારે સાંજના સમયે કોઈ કારણસર આગ લાગી હતી. પેપરમીલ હોવાના કારણે કાગળના ઢગલામાં લાગેલી આગ વિકરાળ બની ગઈ હતી. અને જોત જોતામાં મીલનો કેટલોક ભાગ આગની લપેટોમાં આવી ગયો હતો.

આગના પગલે મીલમાં કામકરતા કામદારોમાં અફરાતરફીનો માહોલ જોવા મળ્યો હતો. અને ફાયર બ્રિગેડને જાણ થતાં ફાયરની ગાડીઓ ઘટના સ્થળે દોડી આવી હતી. અને આગ ઉપર કાબુ મેળવવાનો પ્રયત્ન કરવા લાગ્યા હતા.

સાથે સાથે મેજર કોલ જાહેર કરીને રાજકોટ, હળવદ, મોરબી, વાંકાનેર, ગાંધીધામ, સુરેન્દ્રનગરના વઢવાણ, ચોટીલા અને જામનગરથી ફાયરની ટીમો ઘટના સ્થળે પહોંચી હતી. આગ લાગવાના ત્રણ કલાક બાદ પણ આગને કાબુમાં લેવાના પ્રયત્નો ચાલી રહ્યા છે.

મળતી માહિતી પ્રમાણે અમદાવાદ ફાયર બ્રિગેડની ટીમો પણ સ્થળ ઉપર પહોંચવા માટે રવાના થઈ હતી. ફાયર અધિકારીઓના જણાવ્યા પ્રમાણે સવાર સુધીમાં આગ ઉપર કાબુ મેળવી લેવામાં આવશે.