ગુજરાતમાં હજી પાંચ દિવસ ભારે વરસાદની આગાહી, જાણો ક્યાં ક્યાં મેઘો ઘમરોળશે

ગુજરાતમાં (Gujarat) મેઘરાજાની (Monsoon) ધમાકેદાર બેટિંગનો ત્રીજો રાઉન્ડ શરૂ થયો છે. છેલ્લા 24 કલાકમાં એટલે સોમવારે સવારે 6 કલાક સુધીમાં રાજ્યનાં 128 તાલુકામાં વરસાદ નોંધાયો છે. જેમાં કચ્છનાં મુંદ્રામાં (Kutch Mundra) માત્ર બે જ કલાકમાં સૌથી વધુ 3.72 ઇંચ વરસાદ (Rainfall) ખાબક્યો હતો. રવિવારે સૌરાષ્ટ્રમાં મહત્તમ વરસાદ વરસતા ખેડૂતોમાં ચિંતા વ્યાપી ગઇ હતી. અન્ય વિસ્તારોમાં નોંધાયેલા વરસાદનાં આંકડા જોઇએ તો, સાબરકાંઠાના પ્રાંતિજમાં 88 એમએમ, રાજકોટનાં ધોરાજીમાં 84 એમએમ, અમરેલીનાં ઝાફરાબાદમાં 84 એમએમ જ્યારે રાજકોટનાં ઉપલેટામં 76 એમએમ વરસાદ નોંધાયો હતો. ત્યારે હવામાન વિભાગની આગાહી પ્રમાણે હજુ આગામી પાંચ દિવસ પણ અનેક જિલ્લાઓમાં ભારે વરસાદની સંભાવના છે. (સેટેલાઇટ તસવીર)

હવામાન વિભાગે આગાહી કરતા જણાવ્યું છે કે, 'દક્ષિણ ગુજરાત અને તેને સંલગ્ન અરેબિયન સમુદ્રમાં તેમજ દક્ષિણ પશ્ચિમ ઉત્તર પ્રદેશથી ઉત્તરપૂર્વ અરેબિયન સમુદ્ર અને તેને સંલગ્ન દક્ષિણ ગુજરાતમાં ટ્રો સર્જાયું છે. જેના કારણે સોમવારે સુરત,નવસારી,વલસાડ,દમણ,દ્વારકા,જુનાગઢ,અમરેલી,ગીર સોમનાથ,દીવમાં વરસાદની સંભાવના છે. જ્યારે મંગળવારે એટલે 15મી સપ્ટેમ્બરનાં રોજ સાબરકાંઠા, ગાંધીનગર,અરવલ્લી,ખેડા,અમદાવાદ,આણંદ,પંચમહાલ,દાહોદ,મહીસાગરમાં વરસાદની આગાહી છે. બુધવારે વલસાડ,દમણમાં, ગુરૂવારે સુરત,ડાંગ,તાપી,નવસારી,વલસાડ,અમરેલી,ગીર સોમનાથ અને શુક્રવારે સુરત,ડાંગ,તાપી,નવસારી,વલસાડ,જુનાગઢ,ગીર સોમનાથ,અમરેલીમાં 40થી 60 કિલોમીટર પ્રતિ કલાકની ઝડપે પવન ફૂંકાવવા ઉપરાંત મધ્યમથી ભારે વરસાદ પડી શકે છે. '

રવિવારે બપોર બાદ 4 વાગ્યાથી વાતાવરણમાં પલટો આવ્યો હતો અને કચ્છના મુન્દ્રા તાલુકામાં 2થી 4 ઇંચથી વરસાદ વરસ્યો હતો. સતત બીજા દિવસે વરસાદી ઝાપટાંથી અન્ય 3 તાલુકા અબડાસા, માંડવી અને ભચાઉ તાલુકામાં પણ વરસાદ નોંધાયો હતો. બીજા રાઉન્ડના વરસાદથી વાડી, ખેતરો સુકાયા નથી તેવામાં ત્રીજા રાઉન્ડનાં વરસાદે જગતનાં તાતની ચિંતામાં વધારો કર્યો છે.

ભચાઉ તાલુકાના શિકારપુર, જંગી, સામખિયાળી, લલિયાણા, વાંઢિયા સહિતના ગામોમાં ઝાપટાંથી લઇને એકથી દોઢ ઇંચ જેટલો વરસાદ પડી ગયો હતો. જેના કારણે ખરીફ પાકને સંપૂર્ણ નુકસાન થયું હતું. આ સાથે સમાઘોઘા, ભુજપુર, ઝરપરા, દેશલપર, પ્રાગપર, કપાયા, બરાયા, બોચા, બાબિયા, બેરાજા, વડાલા, લુણી, શેખડિયા, ભદ્રેશ્વરમાં પણ ભારે ગાજવીજ સાથે કલાકમાં સરેરાશ બેથી ત્રણ ઇંચ પાણી પડ્યું હોવાના અહેવાલ સાંપડ્યા હતા.