Gujarat Monsoon: ગોંડલમાં મેઘરાજાની તોફાની બેટિંગ, બનાસકાંઠામાં ધોધમાર વરસાદ

ગુજરાતમાં વિધિવત રીતે ચોમાસાનું આગમન થઇ ગયું છે પરંતુ રાજ્યના ઘણા જિલ્લાઓ એવા છે જ્યાં હજુ પણ જગતનો તાત વરસાદની રાહ જોઇ રહ્યો છે. જોકે દક્ષિણ ગુજરાત અને સૌરાષ્ટ્રને બાદ કરતા રાજ્યમાં ક્યાંય સારો વરસાદ થયો નથી પરંતુ આ દરમિયાન આજે રાજકોટના ગોંડલમાં મેઘરાજા જોરદાર બેટિંગ કરી રહ્યા છે. શહેરમાં ચારેકોર મેઘરાજાની મહેર થઇ છે અને શહેર આખામાં પાણી જોવા મળી રહ્યું છે.

આજે બપોર બાદ બનાસકાંઠાના પાલનપુરમાં વરસાદ પડ્યો છે. બપોરે ઉકળાટ વચ્ચે પવન સાથે વરસાદ પડતા વાતાવરણમાં ઠંડક પ્રસરી ગઇ છે. વાવણીના સમયે વરસાદ થતાં ખેડૂતોમાં ખુશીનો માહોલ જોવા મળી રહ્યો છે.

બીજી તરફ ગોંડલમાં ધોધમાર વરસાદને પગલે શહેરમાં વૃક્ષો ધરાશાયી થયાની ઘટનાઓ સામે આવી રહી છે. ગોંડલ શહેરના અક્ષર મંદિર રોડ પર વૃક્ષો ધરાશાયી થયા છે. અહીં પવન અને ગાજવીજ સાથે વરસાદ વરસતા વૃક્ષો ધરાશાયી થયા છે. વૃક્ષો ધરાશાયી થતા શહેરના અનેક વિસ્તારોમાં વીજળી ગુલ થઇ ગઇ છે.

ત્રણ વાગ્યા આસપાસ પવનના સૂસવાટા સાથએ ગોંડલમાં તોફાની વરસાદ વરસી રહ્યો છે. ગાજવીજ સાથે ધોધમાર વરસાદ વરસતા અનેક વિસ્તારોમાં ઝાડ અને બોર્ડ ધરાશાયી થઇ ગયા છે. કેટલાક વિસ્તારમાં વીજ પુરવઠો પણ ખોરવાઇ ગયો છે જેના કારણે સ્થાનિક લોકો મુશ્કેલીમાં મૂકાયા છે.

ગોંડલમાં હાલ જાહેર માર્ગો પર પાણી ફરી વળ્યા છે ત્યાં જ કેટલાક ઘરો અને દુકાનોમાં પણ પાણી ઘૂસી ગયા છે. તો બનાસકાંઠાના પાલનપુરમાં વૃક્ષો ધરાશાઇ થયા છે અને રોડ રસ્તા પર વાહનચાલકો મુશ્કેલીમાં મૂકાયા છે.