Tauktae વાવાઝોડાનાં ઝખમો: મહિના પછી લોકો અંધારામાં જીવવા મજબૂર, દીવા માટે કેરોસીન પણ નથી

દિનેશ સોલંકી, ગીર સોમનાથ: ટાઉતે વાવાઝોડા (Tauktae Cylone)એ ગીર સોમનાથ જિલ્લા (Gir Somnath District)નાં ઉના અને ગીર-ગઢડા તાલુકામાં જે વિનાશ વેર્યો છે તેના ઝખમો હજુ રૂઝાયા નથી. વાવાઝોડું ગયાને આજે 25થી વધારે દિવસ થયા છતાં હજુ ઉના તાલુકાના અનેક ગ્રામ્ય વિસ્તારોના લોકો અંધારામાં જીવન પસાર કરી રહ્યા છે. ખેતરમાં ઊભેલો પોતાનો મહામુલો મોલ પણ વીજળીને વાંકે સુકાઈ ગયો છે. પશુઓ પાણી માટે ભાંભરડા નાખી રહ્યા છે. આ વિસ્તારની ખમીરવંતી પ્રજા કૂવામાંથી પાણી સિંચીને પશુઓને પાવા માટે મજબૂર છે. અહીં 35 સૈનિકોનો પરિવાર આજે પણ અંધારામાં જીવી રહ્યો છે.

આ હાલત ઉના તાલુકાનાં સનખડા ગામના છે. ઉનાથી 20 કિલોમીટર અંતરે આવેલું સનખડા ગામમાં ગોહિલ દરબારોની વસ્તી વધુ છે. આ ગામનાં 35 જેટલા જવાનો ભારતીય ફોજમાં ફરજ બજાવી રહ્યા છે. આ ફોજીઓનો પરિવાર હાલ અહીં અત્યંત દયનીય સ્થિતિમાં જીવન વિતાવી રહ્યો છે.

સનખડા ગામથી માત્ર બે કિલોમીટરના અંતરે આવેલા માલણ ગામની પણ આવી જ હાલત છે. સનખડા અને માલણ વિસ્તારમાં કુલ 1,500 જેટલા પરિવારો ખેતીવાડીનો વ્યવસાય કરે છે. આ બંને વિસ્તારના 35 જેટલા નવયુવાનો ભારતીય સેનામાં ફરજ બજાવે છે. ગત તારીખ 17 મેના રોજ ટાઉતે વાવાઝોડાને કારણે બાગાયતી વૃક્ષો જેવા કે આંબા અને નાળિયેરી જમીનદોસ્ત બન્યા હતા. અનેક કાચા મકાનો, ઢાળીયા, છાપરા અને નળિયાં ઉડી ગયા હતા.

ગામમાં વીજ પુરવઠો પહોંચાડતા અનેક વીજ પોલ ધરાશાયી થયા હતા. આ ઘટનાને એક મહિના જેટલો સમય થવા આવ્યો છતાં પણ માલણ વિસ્તારમાં કોઈ અધિકારી કે તંત્ર દ્વારા નિમણૂક કરેલી કોઈ ટીમ સર્વે માટે પહોંચી નથી. આજ દિવસ સુધી ગીરની આ વિસ્તારની પ્રજાને તંત્ર દ્વારા કોઈ સહાય પણ ચૂકવવામાં આવી નથી.

સનખડા અને માલણ વિસ્તારમાંથી 35 જેટલા યુવાનો આર્મીમાં જોડાયેલા છે. દેશનાં સીમાડાઓની સાથે  તેઓ મા ભોમની રક્ષા કરી રહ્યા છે. આ વિસ્તારમાં હજુ સુધી સર્વેની ટીમ પહોંચી નથી કે નથી કોઈ સહાય મળી. અહીં પણ વ્હાલા-દવલાની નીતિ કામ કરતી હોય તેવું જણાય રહ્યું છે.

સનખડા અને માલણ ગામે ટાઉતે વાવાઝોડાએ એવો તો વિનાશ વેર્યો કે અહીં લોકો અનેક પરેશાનીનો સામનો કરી રહ્યા છે. છેલ્લા એક મહિનાથી વીજળી ન હોવાથી માલણ વિસ્તારની મહિલાઓ પોતાના મૂંગા પશુઓને કૂવામાંથી પાણી સિંચી તેમની તરસ છીપાવી રહી છે. પશુઓને પાણીની સમસ્યાની સાથે વાડી વિસ્તાર હોવાના કારણે વન્ય પ્રાણીઓનો પણ ભય રહે છે. અધૂરામાં પૂરું કોરોનાનું જોખમ પણ જેમનું તેમ છે.

વીજળીનો પુરવઠો ફરીથી ચાલુ ન થતાં ખેડૂતો ખેતી કરી શકતા નથી. નાના ઝૂંપડા, મકાનો માટે નળિયાં કે છાપરાં મળતા નથી. મળે તો પણ એટલી કિંમત ચૂકવવી પડે છે કે આ વિસ્તારની ભોળી પ્રજાને પરવડે તેમ નથી. આથી આશરો ખુલ્લો છે. ઉપર આભ અને નીચે ધરતી જેવી સ્થિતિ અહીં જોવા મળી રહી છે. કોઈ પૂછવા વાળું પણ નથી.

ચૂંટણીઓ ટાણે નેતાઓ અને અધિકારીઓ ખાનગી વાહનોમાં મત માટે લઈ જાય પણ આજે કોઈ ફરકતું પણ નથી. માલણ વિસ્તારમાં વીજ પુરવઠો છેલ્લા એકાદ માસથી બંધ હોય દીવા કરવા કેરોસીન પણ મળતું નથી. તેલનાં દીવા કરી અહીંના લોકો દિવસો કાઢી રહ્યા છે.

એક તરફ ગુજરાત સરકાર ટાઉતે વાવાઝોડા બાદની પોતાની કામગીરીના ગુણગાન ગાતા થાકતી નથી તો બીજી તરફ સત્ય આપની સામે છે. ઉનાનાં સનખડા અને ફોજીઓના ગામ એવા માલણના લોકો હવે વીજ પુરવઠો તાત્કાલિક અસરથી પુનઃ સ્થાપિત થાય અને આ ગામના બહાદુર લોકોને સરકાર દ્વારા વાસ્તવિક વળતર મળે તેવી અમીટ આશ માંડીને બેઠા છે.

ઉના ડિવિઝનના પીજીવીસીએલના અધિકારી મતે હજુ કેટલા સમયે વાડી વિસ્તારમાં વીજળી પુન:સ્થાપિત થશે તેનો ચોક્કસ સમય કહી શકાય તેમ નથી.