Gujarat Rainfall: 10 તસવીરોમાં જુઓ ગુજરાતનો વરસાદ, ક્યાંક આફત તો ક્યાંક ખુશીની લહેર!

અમદાવાદ: ગુજરાતમાં છેલ્લા ત્રણેક દિવસથી મેઘરાજા જોરદાર બેટિંગ (Gujarat heavy rain) કરી રહ્યા છે. ખાસ કરીને સૌરાષ્ટ્રના દરિયકાંઠાના વિસ્તારોમાં ભારે વરસાદ પડી રહ્યો છે. ગીર-સોમનાથ, જૂનાગઢ, દેવભૂમિ દ્વારકા જિલ્લો વરસાદને કારણે જળ બંબાકાર (Heavy rain in Gir-Somnath District) થઈ ગયો છે. દક્ષિણ ગુજરાત (South Gujarat rain)માં પણ સારો એવો વરસાદ પડી રહ્યો છે. એકંદરે એવું કહી શકાય કે ગુજરાતમાં સાર્વત્રિક વરસાદ પડી રહ્યો છે. છેલ્લા 24 કલાકમાં ગુજરાતના 175 તાલુકામાં વરસાદ (Gujarat rainfall data) નોંધાયો છે. જેમાં સૌથી વધારે વરસાદ ગીર-સોમનાથ જિલ્લાના કોડીનાર, સુત્રાપાડા અને વેરાવળમાં પડ્યો છે. આજે (7 જુલાઈ) પણ ગીર-સોમનાથ જિલ્લામાં સારો વરસાદ પડી રહ્યો છે.

નવસારી: વરસાદ વચ્ચે શહેરમાં વૃક્ષ પડવાની બીજી ઘટના સામે આવી છે. શહેરના આશાબાગ વિસ્તારમાં વૃક્ષ ધરાશાયી થયું છે. આ બનાવમાં કોઈ જાનહાની નથી થઈ. વૃક્ષ પડવાની જાણ થતા નવસારી વિજલપોર ફાયર વિભાગના જવાનો ઘટનાસ્થળે પહોંચી ગયા હતા. ફાયર બ્રિગેડે વૃક્ષની ડાળીઓ કાપી વૃક્ષ દૂર કરવાની તજવીજ હાથ ધરી હતી.

ગીર સોમનાથ: ભારે વરસાદને પગલે ગીર-સોમનાથ જિલ્લો જળબંબાકાર થઈ ગયો છે. વરસાદને પગલે સોમનાથ-ઉના નેશનલ હાઇવેની સ્થિતિ બદતર થઈ ગઈ છે. રોડ પર મોટાં મોટાં ખાડા પડી ગયા છે. બીજી તરફ ઘણા લાંબા સમયથી નેશનલ હાઇવેનું કામ ખૂબ જ ગોકળ ગતિએ ચાલતું હોવાથી લોકોમાં રોષ વ્યાપ્યો છે.

ગીર સોમનાથ: ગીર સોમાનથ જિલ્લામાં બે દિવસથી ધોધમાર વરસાદ પડી રહ્યો છે. જિલ્લામાં ધોધમાર વરસાદથી સુપ્રસિદ્ધ યાત્રા પ્રાચી તીર્થનું સુવિખ્યાત માધવરાયજી મંદિર પાણીમાં ગરકાવ થઈ ગયું છે. સરસ્વતી નદીમાં નવા નીર આવતા માધવરજી પ્રભુ પાણીમાં જળમગ્ન થયા છે. પ્રાંચી પાસે આવેલી સરસ્વતી નદીમાં મોસમનું પહેલું પૂર આવ્યું છે. સરસ્વતી નદીમાં સિઝનનું પ્રથમ પૂર આવતા મંદીરના પૂજારી ઋષિ બાપુએ નવા નીરના વધામણા કર્યાં હતા.

સુરત: સુરતમાં ભારે વરસાદથી ફરી એકવાર તંત્રની પ્રિ-મોન્સૂન કામગીરીની પોલ ખુલ્લી પડી છે. કીમ ગામ ખાતે ગાય બાદ હવે એક એસ.ટી. બસ ખાડામાં ફસાઈ છે. કીમથી ઇલાવ જઈ રહેલી બસ ખાડામાં ફસાઈ ગઈ હતી. આ બનાવમાં કોઈ જાનહાની થઈ નથી. જોકે, બસ કલાકો સુધી મોડી પડવાને કારણે મુસાફરો અટવાયા હતા.

વડોદરા: દર વર્ષે વરસાદની સિઝન સાથે વડોદરામાં મગર દેખાવાના બનાવો બને છે. ગઈકાલે વડોદરા નજીક દેના ગામે મગર જોવા મળ્યો છે. દેના ગામની સરકારી સ્કૂલમાં 6 ફૂટનો મગર આવી ચઢ્યો હતો. રાત્રે બે વાગ્યાની આસપાસ સ્કૂલ પાસે મગર દેખાતા લોકોને કુતૂહલ થયું હતું.

દેવભૂમિ દ્વારકામાં પણ બે દિવસથી મેઘરાજાએ મહેર કરી છે. આ દરમિયાન ગોમતી ઘાટ ખાતે અદભૂત નજારો કેમેરામાં કેદ થયો હતો.

ગીર-સોમનાથ જિલ્લા પર છેલ્લા બે દિવસથી મેઘરાજા તૂટી પડ્યા છે. સુત્રાપાડા, કોડીનાર અને વેરાવળમાં અનારાધાર વરસાદ વરસી રહ્યો છે.

ભારે વરસાદ વચ્ચે પંચમહાલનો એક વીડિયો સામે આવ્યો છે. જેમાં અગ્નિદાહ આપતા પહેલા લાકડા પાણીમાં પલળી ન જાય તે માટે લોકો કાગળ લઈને ઊભેલા નજરે પડે છે.

વાપીમાં કૂવા ફરતે કરવામાં આવેલી દીવાલ કૂવાની અંદર ખાબકી હતો. વલસાડ જિલ્લામાં પણ હવામાન વિભાગ તરફથી ભારે વરસાદની આગાહી આપવામાં આવી છે.

કચ્છ: માંડવીના બીદડા પાસે નર્મદા કેનાલમાં મોટું ગાબડું પડ્યું છે. નીર પહોંચ્યાના 24 કલાકની અંદર જ નર્મદા કેનાલમાં મોટું ગાબડું પડતા કેનાલના પાણી ખેડૂતોના ખેતરમાં ઘૂસી ગયા છે. મોડી રાત્રે 2 વાગ્યાની આસપાસ કેનાલમાં ગાબડું પડ્યું હોવાની શક્યતા છે.