ગીર સોમનાથમાં પુત્રીઓએ નિભાવ્યો પુત્ર ધર્મ, પાંચ દીકરીઓએ માતાને કાંધ આપી અગ્નિ સંસ્કાર કર્યા

દિનેશ સોલંકી, ગીર સોમનાથ : ગીર સોમનાથ (Gir Somnath) જિલ્લાના કોડીનાર Kodinar)ના બાવાના પીપળવા ગામમાં આજે ખુબ જ ભાવુક દ્રશ્યો સર્જાયા હતા. જ્યાં માતાનું મોત થતા પાંચ દીકરીઓએ કાંધ (mother's funeral) આપી પુત્રીઓ પુત્ર ધર્મ અદા કર્યો હતો. એટલું જ નહિ દીકરીઓ માતાના અગ્નિ સંસ્કાર કરવા સ્મશાન પણ પહોંચી હતી.

ગીર સોમનાથ જિલ્લાના કોડીનારના બાવાના પીપળવા ગામમાં ગાંડાભાઈ રાઠોડ અને તેમની પત્ની નાગલબેન રહે છે. આ દંપતીને કુલ 5 દીકરીઓ છે અને દીકરો નથી. આ તમામ દીકરીઓ હાલ પરિણીત છે અને પોતપોતાના સાસરે છે.

જોકે આજે દીકરીઓની માતા નાગલબેનનું બીમારીના કારણે મોત થતાં પરંપરા મુજબ માતા નાગલબેનના અગ્નિની સંસ્કાર કોણ આપશે તે સમસ્યા હતી. જોકે નાગલબેનની 5 દીકરીઓ માતાના મોતની ખબર મળતા બાવાના પીપળવા પહોંચી હતી અને આ પાંચેય દીકરીઓએ માતાને કાંધ આપી અને અગ્નિ સંસ્કાર પણ કર્યા હતા.

સામાન્ય રીતે હિન્દૂ ધર્મમાં મહિલાઓ સ્મશાને જતી નથી. પરંતુ અહીં પોતાની માતાને અંતિમ સંસ્કાર માટે ભાઈ ન હોવાના કારણે આ પાંચેય દીકરીઓએ ધર્મની આંટીઘૂંટી તોડી સ્મશાન પહોંચી અને પોતાની માતાને અગ્નિ સંસ્કાર આપ્યા હતા.

આ દીકરીઓનું કહેવું છે કે અમારે ભાઈ નથી અને અમારી માં ને અમારે કાંધ અને અગ્નિ સંસ્કાર આપવો એ અમારી ફરજ છે. સમાજના રિવાજોની બેડીઓ તોડી આ દીકરીઓ સ્મશાન પહોંચી હતી. જો કે દીકરીઓની આ પહેલને લઈ ગામ લોકોએ પણ આ દીકરીઓને ધન્યવાદ કહ્યું હતું.