સોમનાથ મંદિરમાં આજથી 'સોમેશ્વર મહાપૂજન'નો શુભારંભ, અક્ષય કુમારે મહાપૂજનનો લીધો લાભ

દિનેશ સોલંકી, ગીર-સોમનાથ: સોમનાથ ટ્રસ્ટ દ્વારા સોમનાથ મંદિર (Somnath Temple)માં આવતા દર્શનાર્થીઓ તથા શ્રદ્ધાળુઓ માટે આજ એટલે કે 31મી મેથી રોજથી સોમનાથ મંદિરમાં "સોમેશ્વર મહાપૂજન" પૂજાવિધિનો શુભારંભ કરવામાં આવ્યો છે. બીજી તરફ આજના દિવસે હિન્દી ફિલ્મના પ્રસિદ્ધ અભિનેતા અક્ષય કુમારે (Akshay Kumar) પોતે પ્રથમ પૂજા કરી સોમનાથ મંદિરમાં સોમેશ્વર મહાપૂજન (Someshwar Mahapoojan)નો લાભ લીધો.

આ પૂજા કરવા માટે શ્રદ્ધાળુઓ સોમનાથ ટ્રસ્ટની વેબસાઇટ www.somnath.org પરથી ઓનલાઇન તેમજ મંદિરના પૂજાવિધિ કાઉન્ટર પર ઑફલાઇન પણ પૂજા નોંધાવી શકશે.

હાલમાં સોમનાથ ટ્રસ્ટ દ્વારા મંદિર ખાતે ત્રણ સ્લોટમાં આ પૂજાનો શુભારંભ કરવામાં આવ્યો છે, જેમાં સવારે 8-00 કલાકે, સવારે 9-00 કલાકે, સવારે 10-00 કલાકે કુલ ત્રણ સ્લોટમાં દર કલાકે યજમાન પૂજા કરી ધન્ય બની શકશે.

જે બાદમાં ભગવાનને વસ્ત્ર, જનોઇ, ચંદન, ચોખા, ફૂલ, ફૂલહાર, બિલ્વપત્ર, અબીલ, ગુલાલ, ધૂપ, દીપ, નેવૈદ્ય, મુખવાસ, નીરાજનમ, મંત્રપુષ્પાંજલિ, પ્રદક્ષીણા અને પ્રાર્થના જેવા અનેક ઉપચારોથી પૂજા કરવામાં આવે છે.

આજરોજ સમ્રાટ પૃથ્વીરાજ ફિલ્મ પ્રમોશન માટે અભિનેતા અક્ષય કુમાર, ડિરેક્ટર ચંદ્રપ્રકાશ દ્વિવેદી અભિનેત્રી માનુસી ચીલ્લર સહિત સોમનાથ મંદિર ખાતે પહોચ્યા હતા. તેઓએ આજરોજ સોમેશ્વર મહાપૂજનનો શુભારંભ કરવામાં આવેલ હતો.

આ પ્રસંગે સોમનાથ ટ્રસ્ટના ટ્રસ્ટી પ્રો.જે ડી પરમાર, કોર્ડિનેટર ડૉ. યશોધરભાઇ ભટ્ટ, જનરલ મેનેજર વિજયસિંહ ચાવડા તરફથી તમામ મહાનુભાવોનું સ્વાગત સન્માન કરવામાં આવ્યું હતું.