'કોઇપણ રાજકીય નેતાઓએ ગામમાં પ્રવેશ કરવો નહીં': ગીર સોમનાથના કોબ ગામે લાગ્યા બેનરો

લોકસભાની ચૂંટણીની તારીખો જાહેર થયા બાદ વિવિધ જગ્યાએ સમર્થનમાં કે વિરોધમાં બેનરો લાગ્યા છે. ત્યારે ગીર સોમનાથના ઉનાનાં કોબ ગામે પણ બેનર્સ લાગ્યા છે. જોકે, આ બેનર્સ કોઇ પક્ષના સમર્થનમાં નથી પરંતું ભાજપ હોય કે કોંગ્રેસ તમામના વિરોધમાં બેનર લગાવવામાં આવ્યા છે. જેમાં ઉલ્લેખ થયો છે કે, કોઇપણ રાજકીય નેતાઓએ ગામમાં પ્રવેશ કરવો નહીં. ઉનાના કોબ ગામે ગૌચરની જમીનમાં ગેરકાયદેસર ચાલતા ઝીંગા ફાર્મ બંધ કરવા બાબતે 2009થી માંગણી કરી રહ્યા છે પરંતુ કોઇ સમાધાન ન થતાં ગ્રામજનોએ ગામની બહાર બેનરો લગાવ્યા છે. (દિનેશ સોલંકી, ગીર સોમનાથ)

મળતી માહિતી પ્રમાણે ગીર સોમનાથના ઉનાનાં કોબ ગામે ગૌચરની જમીનમાં ચાલતા ઝીંગા ફાર્મ બંધ કરવા બાબતે ગ્રામજનોએ સરકારમાં 2009થી રજુઆત કરી રહ્યા છે. જોકે અનેક રજૂઆતો કરવા છતાં રાજકીય નેતાઓ અને તંત્રનું પેટનું પાણી પણ હલતું નથી.

આમ ના છૂટકે કંટાળીને ગ્રામજનોએ ભાજપ અને કોંગ્રેસ વિરુદ્ધ વિરોધ દર્શાવ્યો હતો. સાથે સાથે ગામલોકો એકઠાં થઇને બંને પક્ષો વિરુદ્ધ સુત્રોચ્ચા હાઇ હાઇનાં નારા લગાવ્યા હતા.

બેનરમાં ઉલ્લેખ કરવામાં આવ્યો છે કે, કોઇપણ રાજકીય નેતાઓ એ ગામમાં પ્રવેશ કરવો નહીં.