દ્વારકા : પતિએ પત્નીની કરપીણ હત્યા કરી એસિડ ગટગટાવ્યું, હચમચાવી નાખતી ઘટના

મુકંદ મોકરિયા, દેવભૂમિ દ્વારકા : દેવભૂમિ દ્વારકામાં હચમચાવી નાખતી ઘટના સામે આવી છે. દ્વારકાના ટીવી સ્ટેશન વિસ્તારમાં રહેતા એક પરિવારમાં આજે કરૂણાંતિકા સર્જાઈ છે. પરિવારના મોભીએ તેની જ પત્નીનું કાસળ કાઢી નાખ્યું છે. પત્નીની કરપીણ હત્યા કર્યા બાદ પતિએ એસિડ ગટગટાવતા તેને હોસ્પિટલમાં સારવાર માટે ખસેડવામાં આવ્યો છે. ઘટનાની જાણ થતા પોલીસે તપાસના ચક્રો ગતિમાન કર્યા છે.

બનાવની વિગતો મુજબ આજે દ્વારકાના ટીવી સ્ટેશન વિસ્તારમાં રહેતા સુમણિયા પરિવારમાં ખૂની ખેલ ખેલાયો હતો. પતિ લખમણભા કરમણભા સુમણિયા નામના 50 વર્ષીય આધેડે પોતાની જ પત્નીની ઘાતકી હત્યા કરી નાખી હતી. હત્યા બાદ પરિવાર આક્રંદમાં હતો પરંતુ એવામાં લખમણભાએ એસિડ ગટગટાવી આત્મહત્યાનો પ્રયાસ કર્યો હતો.

પત્ની સાથે કોઈ બાબતે તકરારને લઈને આરોપી લખમણભાએ 47 વર્ષીય પત્ની સંતોકબેન લખમણભા સુમણિયા પર ક્રૂર હુમલો કરી અને તેમની હત્યા કરી હતી. હત્યા કર્યા બાદ પોતે જિંદગી ટૂંકાવી લેવાનો પ્રયાસ કરતા રહસ્ય ઘેરાયું હતું.

પોલીસ ઘટનાની જાણ થતા બનાવવાળી જગ્યાએ પહોંચી હતી. પારિવારિક કલેહ કે પછી અન્ય કારણોસર ખેલાયેલા આ ખૂની ખેલમાં એક પરિવારની ખુશીઓ ઉજડી ગઈ છે. બનાવના પગલે પરિવારજનો પર વજ્રાઘાત પડ્યો છે.

મૃતક સંતોક બેનના મૃતદેહને દ્વારકા સિવિલ હૉસ્પિટલ ખાતે સારવાર માટે લાવવામાં આવ્યો છે જ્યારે એસિડ ગટગટાવનાર આરોપી લખમણભાને વધુ સારવાર માટે જામનગરની જીજી હૉસ્પિટલમાં ખસેડવામાં આવેલ હોવાની વિગતો સામે આવી છે. પોલીસ ઘટનાના મૂળ સુધી પહોંચવા પ્રયાસ કરી રહી છે.