દ્વારકા : રાજ્યમાં લગ્નસરાની સિઝન શરૂ છે. કોરોના વાયરસના સંક્રમણની વચ્ચે સરકારે લગ્ન કરવા માટે મર્યાદિત સંખ્યામાં મહેમાનો લાવવાની છૂટ આપી છે. જોકે, જેમના ઘરે પ્રસંગ હોય ત્યાં ઉત્સાહમાં આ બધી વાતો ભૂલાઈ જાય છે. લગ્નસરામાં ભીડ એકઠવી થવી સામાન્ય છે પરંતુ આજે દ્વારકાના જામખંભાળિયા તાલુકાના મોવાણ ગામે એક અનોખો લગ્ન થયા હતા. અહીંયા જાન લાલ મોટરમાં ગુલાબી ગજરો લઈને નહીં પરંતુ સફેદ હેલિકોપ્ટરમાં આવી હતી. જેના કારણે લોકોના ટોળેને ટોળા એકઠા થઈ ગયા હતા.
અહીંયા મોવાણ ગામેથી હેલિકોપ્ટરમાં ભાણવડાના શણખલા ગામે જાન આવી હતી. આ જાનમાં વરરાજ નિર્મલ ગોજીયાને જોવા માટે આખું ગામ ભેગું થઈ ગયું હોય તેવો ઘાટ સર્જાયો હતો. લોકોનો વિશાળ કાફલો હેલિપેડ પર જોવા મળ્યો હતો
એક ઇવેન્ટ કંપનીના માધ્યમથી આયોજિત આ લગ્ન સમારોહમાં આકર્ષણ હેલિકોપ્ટર હતું અને તેથી જ લોકોની ભીડ થવી પણ સ્વાભાવિક હતી. જોકે, જાનૈયા કરતા માનૈયાઓએ આ વાતનું ધ્યાન રાખવાની આવશ્યકતા હતી કે કોરોના વાયરસ ક્યાંય ગયો નથી.
