બોટાદ : ગંભીર બેદરકારી! કોરોનાની કીટ વગર જ મતદાન શરૂ, લાલિયાવાડીના દૃશ્યો સામે આવ્યા

પ્રકાશ સોલંકી, બોટાદ : રાજ્યની (Gujarat) 81 નગરપાલિકા, 31 જિલ્લા પંચાયતો, 231 તાલુકા પંચાયતોની સામાન્ય તથા 23 નગરપાલિકા અને 3 તાલુકા પંચાયતની પેટા ચૂંટણી (Local Body polls) આજે રવિવારે 28 ફેબ્રુઆરીના (Sunday, 28th February) રોજ મતદાન યોજાઈ રહ્યું છે. જોકે, આ મતદાન દરમિયાન આરોગ્ય વિભાગના કર્મચારીએ હાજર રહેવાનું હોય છે અને મતદારોને કોરોના કીટ જેમ કે માસ્ક, ગ્લવ્ઝ પહેરાવીને મતદાન કરાવાવાનું હોય છે.

દરમિયાનમાં બોટાદ જિલ્લાના ઉગામેડીની કેન્દ્રવર્તી શાળામાં કોરાનાની ગાઇડલાઇનને નેવે મૂકીને મતદાન શરૂ થઈ ગયું હતું. અહીંયા આરોગ્યકર્મી ફરજ પર નહોતા અને માત્ર ચૂંટણી સ્ટાફ જ હતો તેથી મતદારોને માસ્ક કે ગ્લવ્ઝ પહેરાવ્યા વગર જ મતદાન થઈ રહ્યું હતું.

આરોગ્ય વિભાગ દ્વારા મતદાન મથકોને કીટ આપવામાં આવી છે પરંતુ અહીંયા કોઈ કર્મચારી ફરજ પર ન હોવાથી લાલિયાવાડીના દૃશ્યો સામે આવ્યા હતા. આમ ગાઇડલાઇન વગર મતદાન થતું હોવાથી જો કોઈ કોવિડ સંક્રમિત થાય તો સમગ્ર કેન્દ્રમાં આવનાર લોકો પર જોખમ સર્જાયું છે.

આ ચૂંટણીમાં ભાજપ (BJP) અને કૉંગ્રેસ (Congress) વચ્ચે જંગ રહેશે. આ સાથે AAP, BSP અને AIMIM પણ ચૂંટણી લડી રહ્યાં છે. ચૂંટણીમાં મતદાનનો સમય સવારના 7થી સાંજના 6 વાગ્યા સુધીનો છે. જ્યારે કોરોનાગ્રસ્ત દર્દીઓ સાંજના 5થી 6 વાગ્યા સુધીમાં મતદાન કરી શકશે. . જ્યારે 2 માર્ચે મતગણતરી (Voting) હાથ ધરાશે. રાજ્યની 8200થી વધુ બેઠકો પર 22,200 કરતાં વધુ ઉમેદવારોનું ભાવિ ઈવીએમ કેદ થશે.