બોટાદ: દારૂના અડ્ડાઓ પર દરોડા, મહિલા બુટલેગરના ઘરેથી મળ્યા રૂ. 6 લાખ રોકડા

પ્રકાશ સોલંકી, બોટાદ:  બોટાદ જિલ્લાના અનેક ગામમાં દારુની હાટડીઓ પર પોલીસના દરોડા પાડવામાં આવ્યા, જેમાં એક મહિલા બુટલેગરના ઘરેથી 6 લાખ રોકડા પણ મળી આવ્યા. જિલ્લા પોલીસ વડા સહિતનો પોલીસ કાફલો દરોડામા જોડાયો હતો. રાણપુર, ચોકડી, બરવાળા સહિતના ગામોમાં પોલીસે મેગા ડ્રાઈવ કરી દરોડા પાડ્યા.

ગુજરાત રાજ્યના મુખ્ય પોલીસ અધિક્ષક શિવાનંદ ઝા દ્વારા જુગાર અને દારૂની બદીને દૂર કરવા તમામ જીલ્લા પોલીસને દરોડા પાડવાની સૂચના આપી છે. ત્યારે આજે બોટાદ જિલ્લા પોલીસ વડા હર્ષદ મહેતાએ જિલ્લાની પોલીસને સાથે રાખી રણપુર અને બરવાળામાં ચેકિંગ હાથ ધર્યું હતું.

આજે વહેલી સવારના જિલ્લા પોલીસ વડા હર્ષદ મહેતા દ્વારા પોલીસ પરેડ ગ્રાઉન્ડ ખાતેથી તમામ પોલીસ કર્મચારીઓ અને કોન્સ્ટેબલને સાથે રાખી બોટાદ જિલ્લાના રાણપુર તાલુકામાં અને બરવાળા તાલુકામાં દારૂ વેંચતા ઇસમોને ત્યાં ચેકિંગ હાથ ધર્યુ હતું. જેમાં રાણપુરમાં ત્રણ કેસો કરવામાં આવ્યા હતા.

રાણપુરમાં આજે પાડેલી રેડ દરમિયાન ત્રણ અલગ અલગ જગ્યા પર રેડ પાડવામાં આવી હતી. જેમાં બે જગ્યા પરથી 12 લીટર દેશી દારૂ મળી આવ્યો હતો અને મહિલા બુટલેગરને ત્યાંથી 6.29.570 રોકડા મળી આવ્યા હતા, જેની સામે ગુન્હો નોંધી કાયદેસરની કાર્યવાહી હાથ ધરવામાં આવી છે. તેમજ બરવાળા તાલુકામાં દેશી દારૂની ભઠી ચલાવતા ઇસમોને ત્યાં ચેકિગ હાથ ધરવામાં આવ્યું હતુ. સમગ્ર રેડમાં એલ.સી.બી. સહિત જિલ્લાના ડી.વાય.એસ.પી., પી.આઈ., પી.એસ.આઇ અને સ્ટાફ જોડાયો હતો.