ભાવનગર : કરૂણ ઘટના! યુવક-યુવતીએ વીજપોલ પર લટકી ગળેફાંસો ખાધો, આપઘાતથી અરેરાટી

અનિલ માઢક, મહુવા : પ્રેમ એક એવો શબ્દ અને અનુભૂતિ છે કે વ્યક્તિ તેમાં પડે ત્યારે એક બીજા માટે કઈ પણ કરી છુટવા તૈયાર થઈ જાય છે. સમયનાં વહેણ સાથે પ્રેમ બદલાઈ રહ્યો છે પરંતુ પ્રેમીઓ પ્રેમ પામવા માટે કઈ પણ મર્યાદા લાંધી જતા હોય છે. આજે આવા જ એક પ્રેમી પંખીડાઓએ સમાજની બીકે ફાંસો ખાઈને જિંદગી ટૂંકાવી લેતા અરેરાટી વ્યાપી ગઈ છે.

બનાવ છે ભાવનગર જિલ્લાના બગદાણા-ધરાઈ રોડ પરનો. આજે અહીંયાથી પસાર થતા રાહદારીઓને વીજ પોલ પરથી લટકી અને ફાંસો ખાધેલી હાલતમાં બે મૃતદેહ જોવા મળ્યા હતા. ઘટના જોઈને નજરે જોનારા સૌ કોઈ હતપ્રભ થઈ ગયા હતા.

થોડી વારમાં તપાસ કરતા આ પ્રેમી પંખીડાએ તળાજાના રતનાપર ગામના હોવાનું જાણવા મળ્યું હતું. પ્રેમી પંખીડાએએ પરિવાર અથવા તો સમાજ પ્રેમ સંબંધો નહીં સ્વીકારે તેવી બીકે આ અંતિમ પગલું ભરી લીધું હોવાની આશંકા છે.

આપઘાત કરતા પહેલાં ગઈકાલે રાત્રે બંનેએ કોઈ મંદિરે દર્શન કર્યા હોવાની શક્યતા જણાઈ રહી છે. બંનેના લલાટે ચાંલ્લો જોવા મળતા આશંકા વ્યાપી હતી. જોકે, બનાવની જાણ થતા બગદાણા પોલીસ ઘટના સ્થળે દોડી આવી હદતી અને મૃતદેહને પોસ્ટમોર્ટમ માટે ખસેડવાની તજવીજ શરૂ કરી હતી.

21મી સદીમાં પ્રેમે નાત-જાતના ધર્મના દેશ-પરદેશના વાડા ભાંગી નાખ્યા છતાં હજુ પણ સામાજિક રૂઢીઓ અને પારિવારીક મર્યાદાઓ જીવંત છે. આ સ્થિતિમાં કાચી ઉંમરે સ્થિતિઓને ન સમજી શકવાની આવડત અને આવેગ યુવક-યુવતીઓનાં ભોગ લઈ રહ્યા છે ત્યારે આ કિસ્સો વધુ એક વાર સમાજ માટે લાલબત્તી સમાન સાબિત થયો છે.