અમદાવાદ: ચોમાસાની ઋતુ (Monsoon) દરમિયાન ડેમ ઓવરફ્લો થવાના સમાચાર આવતા હોય છે. જોકે, અમરેલીના રાજુલામાં શિયાળામાં કમોસમી વરસાદ (Unseasonal rain)ને પગલે ડેમ ઓવરફ્લો થયો છે. અમરેલી જિલ્લામાં 10 અને 11 તારીખે કમોસમી વરસાદ નોંધાયો છે. જેના પગલે રાજાલાના રાજુલા ઘાતરવડી ડેમ-2 (Dhatarwadi Dam-2)માં પાણીની આવક થઈ છે. પાણીની આવકને પગલે ડેમ ઓવરફ્લો (Dam overflow) થયો છે. શિયાળાની ઋતુમાં આ ડેમ ઓવરફ્લો થયો હોય તેવો આ પ્રથમ બનાવ છે.
ડેમમાં પાણીની આવત થતાં તંત્ર તરફથી ડેમનો દરવાજો બે ઇંચ સુધી ખોલીને પાણીને છોડવામાં આવ્યું છે. આ સાથે જ નીચાણવાળા વિસ્તારોને એલર્ટ કરી દેવામાં આવ્યા છે. ડેમના નીચાણવાળા વિસ્તારમાં આવેલા ખાખબાઈ, હિંડોરણા, વડ,ભચાદર સહિત આસપાસના 5થી વધારે ગામને એલર્ટ કરી દેવામાં આવ્યા છે.
રાજ્યના 136 તાલુકામાં વરસાદ : હવામાન વિભાગની આગાહી પ્રમાણે 10મી અને 11મી ડિસેમ્બરના રોજ ગુજરાતના અલગ અલગ વિસ્તારોમાં વરસાદ પડ્યો છે. 11મી તારીખે સવારે છ વાગ્યાથી બપોરના બે વાગ્યા સુધીના આંકડા પ્રમાણે રાજ્યના 136 તાલુકામાં વરસાદ નોંધાયો છે.
જેમાં સૌથી વધારે વરસાદ વલસાડ જિલ્લાના ઉમરગામમાં 35 મિલી મીટર પડ્યો છે. અમરેલીના જાફરાબાદમાં 30 મિલી મીટર વરસાદ પડ્યો છે. છોટાઉદેપુર, પારડી અને વાપીમાં એક-એક ઇંચ વરસાદ પડ્યો છે. તો ભરૂચમાં 23 મિલી મીટર વરસાદ પડ્યો છે.
કૉંગ્રેસે ખેડૂતોને વળતર આપવાની કરી માંગ: હવામાન ખાતા (Weather Department)ની આગાહી પ્રમાણે રાજ્યના અનેક વિસ્તારોમાં કમોસમી વરસાદ (Unseasonal Rain) પડ્યો છે. વરસાદને પગલે માર્કેટિંગ યાર્ડો (APMC)માં પડી રહેલો માલ પલળી ગયો છે. આ ઉપરાંત વરસાદને પગલે ખેડૂતોને શિયાળું પાકને પણ નુકસાન થવાની ભીતિ સેવવામાં આવી રહી છે. કમોસમી વરસાદ મામલે ગુજરાત પ્રદેશ કૉંગ્રેસ અધ્યક્ષ અમિત ચાવડા (Amit Chavda)એ ખેડૂતોને નુકસાન વળતર આપવાની માંગણી કરી છે.
