જૂનાગઢ: રોડ પર દોડી રહેલી બસ બ્રેક ફેલ થતા સ્કૂટરને કચડીને ફરસાણની દુકાનમાં ઘૂસી ગઈ!

જૂનાગઢ: જૂનાગઢમાં એસ.ટી. બસે અકસ્માત સર્જ્યો છે. રોડ પર દોડી રહેલી બસની બ્રેક ફેલ થતા બસ ફરસાણની દુકાનમાં ઘૂસી ગઈ હતી. મળતી માહિતી પ્રમાણે બસની બ્રેક ફેલ થયા બાદ તે અચાનક રિવર્સ દોડી હતી. આ દરમિયાન બસે એક સ્કૂટરને કચડી નાખ્યું હતું. સ્કૂટરને કચડીને બસ દુકાનમાં ઘૂસી જતાં અફડાતફડી સર્જાઈ હતી.

મળતી માહિતી પ્રમાણે મોણપરી રાજકોટ રૂટની એસ.ટી. બસ વિસાવદરના જૂના બસ સ્ટેન્ડમાં પહોંચી ત્યારે આ ઘટના બની હતી. સદનસીબે આ બનાવનાં કોઈ જાનહાની થઈ ન હતી. જોકે, બસની ઘૂસી જતા સ્કૂટર અને દુકાનને નુકસાન થયું છે. બીજી તરફ સલામત સવાર, એસ.ટી. અમારીના દાવા પોકળ સાબિત થયા છે.

આ અંગે વધારે પ્રાપ્ત થયેલા માહિતી પ્રમાણે ટ્રાફિકથી ધમધમતા વિસ્તારમાં હનુમાનપરા તરફથી આવેલ એસ.ટી. બસ નવા બસ સ્ટેન્ડ તરફ જઈ રહી હતી ત્યારે જૂના બસ સ્ટેન્ડમાં નગરપાલિકા નજીક અચાનક બસની બ્રેક ફેલ થતા એક સ્કૂટરને કચડીને ફરસાણની દુકાનમાં ઘૂસી ગઈ હતી.

અકસ્માત સર્જનારી બસનો નંબર GJ-18 Z 4473 છે. જે બપોરના એક વાગ્યા આસપાસ બસ સ્ટેન્ડ ખાતે એકાએક બ્રેક લાગવાની બંધ થઈ ગઈ હતી. બીજી તરફ બસ રિવર્સમાં દોડતા ફરસાણની દુકાનમાં ઘૂસી ગઈ હતી.

ડાંગમાં એસ.ટી. બસને અકસ્માત નડ્યો : બીજા એક બનાવમાં ડાંગમાં પણ એક એસ.ટી. બસને અકસ્માત નડ્યો છે. અહીં સાપુતારાથી બાલાસિનોર જતી બસને રસ્તામાં અક્સમાત નડયો છે. સાપુતારાથી બાલાસિનોર તરફ જતી બસ ચીખલી ગામથી આગળ નીકળી ત્યારે રસ્તામાં ટર્નમાં અકસ્માત નડ્યો હતો. બસમાં સવાર તમામ મુસાફરો સુરક્ષિત છે. જોકે, તેમને નાની મોટી ઈજા થઈ હતી.

ડાંગમાં એસ.ટી. બસને અકસ્માત નડતા મુસાફરોને નાની મોટી ઈજા પહોંચી હતી.