જીવના જોખમે મુસાફરીઃ લીલી પરિક્રમામાં ઉમટી પડ્યાં બે લાખ ભાવિકો

જૂનાગઢઃ આ વર્ષે વન વિભાગ દ્વારા પ્રવાસીઓના ધસારાને ધ્યાનમાં રાખીને બે દિવસ પહેલા જ લીલી પરિક્રમાની શરૂઆત કરી દેવામાં આવી છે. એક અંદાજ પ્રમાણે પ્રથમ દિવસે આશરે બે લાખ જેટલા લોકોએ પરિક્રમામાં ભાગ લીધો છે. શુક્રવાર સાંજથી જ જૂનાગઢમાં માનવ મહેરામણ ઉમટી પડ્યું હતું.

બીજી તરફ જૂનાગઢ આવવા માટે યાત્રિકા પોતાના જીવ જોખમમાં મૂકી રહ્યા હોય તેવા સમાચારો પણ પ્રાપ્ત થયા છે. લોકો ટ્રેન અને ખાનગી વાહનોમાં જીવના જોખમે મુસાફરી કરીને જૂનાગઢ પહોંચી રહ્યા છે.

36 કિલોમીટરની ગીરનારની પરિક્રમા 19મી તારીખી શરૂ થવાની હતી, પરંતુ તંત્રએ ધસારાને જોતા બે દિવસ પહેલા જ પરિક્રમા શરૂ કરી દીધી છે.

જીવના જોખમે મુસાફરીઃ જૂનાગઢની પરિક્રમામાં આવવા માટે લોકો ટ્રેનમાં જીવના જોખમે મુસાફરી કરી રહ્યા છે. ઢસા-અમેરેલીથી જૂનાગઢ જતી ટ્રેનમાં મુસાફરો ટ્રેનના ડબ્બા ઉપર સવાર થઈને મુસાફરી કરતા હોય તેવા દ્રશ્યો સામે આવ્યા છે.

ધારીથી જૂનાગઢ જવા માટે રેલવે સ્ટેશન પર પ્રવાસીઓનો ખૂબ ધસારો થઈ ગયો છે. ટ્રેનમાં અંદર જગ્યા ન મળતા પ્રવાસીઓ ડબ્બાની ઉપર સવાર થઈને જૂનાગઢ પહોંચી રહ્યા છે. નોંધનીય છે કે આવી રીતે મુસાફરી કરવાને કારણે અકસ્માતનું જોખમ વધી જાય છે. એટલું જ નહીં ટ્રેન જ્યારે અંડરબ્રિજથી પસાર થાય છે ત્યારે પણ અકસ્માતનું જોખમ રહે છે. ટ્રેન ઉપરાંત ખાનગી વાહનોમાં પણ મુસાફરો જીવના જોખમે મુસાફરી કરીને જૂનાગઢ પહોંચી રહ્યા છે.