Jamnagar: જીમ નહીં, આ ઐતિહાસિક અખાડામાં યુવાનો કરે છે કસરત, દારાસિંગે પણ અહીં કરી હતી કસરત

Kishor chudasama,Jamnagar : જામનગરમાં રાજાશાહી વખતથી ચાલતા અખાડા એ આજે પણ પોતાનું અસ્તિત્વ અકબંધ રાખ્યું છે. જેમાં અનેક લોકો દેશી કસરત થકી પરસેવો પાડી શરીર અડીખમ બનાવી રહ્યા છે.

આજે પણ અહીં હનુમાનદાદાની પ્રાર્થના બાદ કસરતનો પ્રારંભ કરવામાં આવે છે અને દિગ્વિજય વ્યાયામ મંદિર તરીકે ઓળખાતો આ અખાડો શહેરના સ્પોર્ટસ કોમ્પ્લેક્ષમાં આવેલો છે. જેનું વિશ્વનાથ વ્યાયમ પ્રચારક મંડળ દ્વારા સંચાલન કરવામાં આવે છે. જેના નેજા હેઠળ અહીં ભૂતકાળમાં ઘોડે સવારી, તળાવમાં બોટિંગ સહિતની પ્રવૃતિઓ થતી હતી.

આ આજે અખાડો છે જયાં ભારતના મહાન કુસ્તીબાજ દારાસિંગે પણ 10 દિવસ કસરત કરી હતી. વર્ષ 1970-72ના સમય ગાળા દરમિયાન દારાસિંગ ફિલ્મના શૂટિંગ અર્થે જામનગરની મુલાકાતે આવ્યા હતાં. આ વેળાએ 10 દિવસના રોકાણ દરમિયાન તેમણે જામનગરના આ અખાડામા પરસેવો પાડ્યો હતો.

જામનગરમાં ઠેકઠેકાણે જિમ આવેલાં છે એ જિમમાં શિયાળાના પ્રારંભની સાથે જ લોકો શરીરને મજબૂત બનાવવા દોડતા હોય છે ત્યારે જિમના આ જમાનામાં આજે પણ રાજાશાહી વખતનો એક અખાડો ધમધમી રહ્યો છે.

હાલ અહીં ડંબેલ, ડલ બેઠક, ગદા સહિતની જૂની પદ્ધતિથી કસરત કરવામા આવે છે. તેમાં 15 વર્ષથી નાના બાળકોને નિઃશુલ્ક અને અન્ય યુવાનોને માત્ર 100 રૂપિયાના વાર્ષિક ચાર્જ પેટે કસરત શીખવવામાં આવે છે.

રોજ સવાર- સાંજ 6 થી 8 વાગ્યા દરમિયાન અહીં કસરત કરાવવામાં આવે છે. દરરોજ હનુમાન દાદાની પ્રાર્થના કરાઈ છે ઉપરાંત દર મંગળવારે અને શનિવારે હનુમાન ચાલીસાના પાઠ પણ અહીં કરવામા આવે છે. વધુમાં બાળકોને કસરત સાથે હિન્દૂ સંસ્કૃતિના વિચારો પણ પીરસવામાં આવે છે.

વધુમાં મેં માસમાં દાવ પેચના નિઃશુલ્ક કેમ્પ પણ યોજાઈ છે. મહત્વનું છે કે કોરોના બાદ લોકોમાં શરીર પ્રત્યે સજાગતા આવતા જિમ ઉભરાઈ રહ્યા છે પરંતુ જિમની કસરત છોડ્યા બાદ મસલ્સ ઢીલા પડી જવાય સહિતની આડ અસર થાય છે ક્યારે અખાડાની દેશી કસરતથી વૃદ્ધાવસ્થા દરમિયાન ખૂબ જ શારીરિક મજબૂતાઈ રહે છે.

19, 2, 1933ના રોજ સંસ્થાની સ્થાપના કરાઈ હતી. જે તે સમયના રાજાએ બે પહેલવાનોને બોલાવ્યા હતા અને અલિયાબાળા ગામે કેમ્પ યોજી 30 યુવાનોને તાલીમ અપાઈ હતી.

ત્યારબાદ આ 30 યુવાનોને જામનગર પંથકના ગામેગામ લોકોને સ્વરક્ષણની તાલીમ આપી હતી.