ઓપરેશન જીપીએસ : ભારતની અંતરીક્ષમાં ઐતિહાસિક સફળતા

ભારતે આજે અંતરિક્ષ ક્ષેત્રે વધુ એક હરણફાળ ભરી છે. ભારતે સ્વદેશી બનાવટના જીપીએસ સેટેલાઇટને સફળતાપૂર્વક લોન્ચ કરીને વિશ્વમાં પોતાનો દબદબો સ્થાપિત કર્યો છે.

કારગિલ યુધ્ધ વખતે ભારત પાસે જીપીએસ આધારિત ટેકેનોલોજી ના હોવાને લીધે યુધ્ધમાં કપરી સ્થિતિનો સામનો કરવો પડ્યો હતો. આ સમયે ભારતે અમેરિકા પાસે મદદ પણ માંગી હતી. જોકે અમેરિકાએ મદદનો ઇન્કાર કર્યો હતો.

બસ, ત્યારે ભારતીય સેનાએ યુધ્ધના મેદાનમાં દુશ્મનો સામે સીધી લડત કરી હતી તો બીજી તરફ ભારતીય વૈજ્ઞાનિકોએ ટેકનોલોજી માટે જંગ છેડ્યો હતો.

ભારતીય સેનાને મહામુસીબતે ઓપરેશન વિજય પાર પાડ્યું તો વૈજ્ઞાનિકોએ પણ ઓપરેશન જીપીએસ સફળતાપૂર્વક પાર પાડી બતાવ્યું છે.

છેલ્લા 17 વર્ષની આકરી મહેનત બાદ ભારતીય વૈજ્ઞાનિકોએ જીપીએસ સિસ્ટમમાં સફળતા મેળવી અમેરિકાને પણ ચોંકાવી દીધું છે.

જીપીએસ પ્રણાલીના સાત સેટેલાઇટ પૈકી છ સેટેલાઇટ અગાઉ પૃથ્વીની ભ્રમણ કક્ષામાં સ્થાપિત કરી દેવામાં આવ્યા છે. જ્યારે છેલ્લો સેટેલાઇટ IRNSS-1G આજે બપોરે શ્રીહરિકોટા ખાતેથી પ્રક્ષેપણ કરી અંતિમ પડાવ સફળતાપૂર્વક પાર પાડ્યો છે. જેને પગલે હવે ભારતના અંતરીયાળ વિસ્તારોનું પણ સફળતાથી લોકેશન મેળવી શકાશે.