આસામ: ઉંદરોએ ATMમાં રહેલી રૂ.12 લાખની નોટો કાતરી નાખી!

આસામના તિનસુકીયામાં સ્ટેટ બેન્ક ઓફ ઇન્ડિયાના એટીએમમાં ઉંદરોએ 12 લાખ રૂપિયાની નોટોને કાતરી નાંખ્યાં છે. જણાવવામાં આવી રહ્યું છે કે આ મામલો 11 જૂનનો છે. આ આખી ઘટનાના ફોટા કોઇએ સોશિયલ મીડિયા પર નાંખ્યા પછી જોરદાર વાયરલ બન્યાં હતાં.

જાણકારી પ્રમાણે, તિકસુકિયાના એસબીઆઈનું એટીએમ મશીન બંધ થવાની જાણકારી આપી. જે પછી કર્મચારી મશીનને ઠીક કરવા પહોંચ્યા અને મશીન ખોલ્યું તો કર્મચારી હેરાન રહી ગયા. તેમણે જોયું કે પાંચસો અને બે હજાર રૂપિયાની નોટને મશીનમાં ઉંદરોએ કાતરી દીધી છે. આ અંગે એક બેંક અધિકારીએ જણાવ્યું કે તિનસિકિયાના લૈપુસી વિસ્તારનું એટીએમ 20 મેથી ટેકનીકલ ખરાબીને કારણે બંધ હતું.

ફરિયાદ મળતાની સાથે 11 જૂનના રોજ એટીએમના સમારકામ કરનારી કંપની ગ્લોબલ બિઝનેસ સોલ્યુશન (જીબીએસ)ના કર્મચારી મશીન બરાબર કરવા પહોંચ્યાં હતાં.

બેંક અધિકારીએ આ ઘટનાની પુષ્ટિ કરતા કહ્યું કે 12 લાખ 38 હજારની નોટોને ઉંદરોએ કાતરી નાખી છે. માત્ર 17 લાખની કિંમતોની નોટ બચી ગયા છે. જીબીએસે 19 મેના રોજ મશીનમાં 20 લાખ રૂપિયા જમા કરાવ્યાં હતાં. જે પછી બીજા દિવસે જ એટીએમ બંધ થઇ ગયું હતું.

આ ઘટનાની તપાસમાં એક એફઆઈઆર પણ નોંધાવવામાં આવી છે. કેટલાક લોકોએ ઘટના અંગે સંદેહ જાહેર કર્યો છે. તેમનું કહેવું છે કે 20 મેના રોજ એટીએમ બંધ થયું છે અને આશરે એક મહિના પછી એટીએમ મશીન મિકેનીક રીપેર કરવા આવ્યાં છે.