સુરતઃ પત્નીના પ્રેમીની હત્યા કરી પતિ પહોંચ્યો પોલીસ સ્ટેશન

સુરત રેલવે સ્ટેશનના પ્લેટફોર્મ નંબર 4 ઉપર એક યુવકની જાહેરમાં હત્યા થવાની ઘટનાની શાહી સુકાઇ નથી ત્યાં કતારગામમાં વધુ એક યુવકની હત્યા થઇ છે. કતારગામમાં ટેલરની દુકાન ધરાવતા યુવકની દુકાનમાં જ હત્યા કરવામાં આવતા સમગ્ર વિસ્તારમાં ચકચાર મચી ગઇ હતી. આ અંગે જાણ થતાં પોલીસ પમ ઘટના સ્થળે પહોંચીને આગળની કામગીરી હાથધરી હતી. (કિર્તેષ પટેલ, સુરત)

મળતી માહિતી પ્રમાણે સુરતના ઉધના વિસ્તારમાં આવેલા ઉદયનગરમાં મકવાણા ટેલર નામની દુકાન આવેલી છે.

આ દુકાનમાં મકવાણા યુવક પોતાનું કામ કરતો હતો ત્યારે અજાણ્યા યુવક આવી તેના ઉપર તીક્ષ્ણ હથિયારોથી હુમલો કરી મોતને ઘાટ ઉતાર્યો હતો.

મૃતક યુવકના હત્યારા યુવકની પત્ની સાથે પ્રેમ સંબંધ હોવાના કારણે યુવકની હત્યા કરવામાં આવી હોવાની પ્રાથમિક વિગતો મળી રહી છે. હત્યા કર્યા બાદ યુવક પોલીસ મથકે હાજર થયો છે.

આ ઘટનાના પગલે સમગ્ર વિસ્તારમાં ચકચાર મચી ગઇ હતી. સ્થાનિક લોકોએ આ અંગે પોલીસને જાણ કરી હતી. જેના પગલે કતારગામ પોલીસની ટીમ ઘટના સ્થળે પહોંચીને વધુ આગળની કાર્યવાહી હાથધરી હતી.