Weather Forecast By Ambalal Patel: અંબાલાલ પટેલે ગુજરાત માટે કરી છે બર્ફીલી ઠંડી સાથે માવઠાની આગાહી

અમદાવાદઃ હાલમાં ઠંડીનું જોર જામ્યું છે, જેમાં સૌરાષ્ટ્ર અને કચ્છના કેટલાક ભાગોમાં ગાત્રો થીજવતી ઠંડી પડવાની સંભાવના વ્યક્ત કરવામાં આવી રહી છે. અંબાલાલ પટેલ બાદ હવે હવામાન વિભાગે પણ માવઠાની સંભાવના વ્યક્ત કરી છે. અંબાલાલ પટેલે ઠંડીનું જોર ઘટવાની આગાહી કરી છે. ફરી એકવાર અંબાલાલ પટેલે આગાહી કરી છે કે રાજ્યમાં લઘુત્તમ તાપમાન વધવા છતાં રાજ્યમાં ઠંડીનું જોર રહેશે આ સાથે તેમણે રાજ્યમાં ક્યારે માવઠું થઈ શકે છે તે અંગે સંભાવના વ્યક્ત કરી છે.

અંબાલાલ પટેલે જણાવ્યું કે, હાલમાં રાજ્યમાં ઠંડીનું જોર છે 27, 28 અને 29 જાન્યુઆરી દરમિયાન ઠંડીમાં ઘટાડો થવાની શક્યતા રહેશે. આમ છતાં ઠંડીનો ચમકારો રાત્રીના સમય દરમિયાન અનુભવાતો રહેશે તેમ તેઓએ જણાવ્યું છે.

અંબાલાલે કહ્યું કે, લઘુત્તમ તાપમાન ઘણાં ભાગોમાં વધવાની શક્યતા છે. મધ્ય ગુજરાતના ભાગોમાં લઘુત્તમ તાપમાનનો પારો 17થી 18 ડિગ્રી સેલ્સિયસ રહેવાની સંભાવના છે. અમદાવાદના ભાગોમાં લઘુત્તમ તાપમાન 17-18 ડિગ્રી સેલ્સિયસ રહેવાની શક્યતા છે. દક્ષિણ ગુજરાતના ભાગોમાં લઘુત્તમ તાપમાન 20 ડિગ્રીની આસપાસ રહી શકે છે.

હવામાન નિષ્ણાંત અંબાલાલ પટેલે સૌરાષ્ટ્રમાં પણ ઠંડીનું જોર ઘટશે તેવી આગાહી કરી છે. તેમણે કહ્યું કે, ઠંડીમાં ઘટાડો થવા છતાં રાત્રી દરમિયાન બરફીલી ઠંડી અનુભવાશે. ફેબ્રુઆરી મહિનામાં પણ લઘુત્તમ તાપમાન વધારો-ઘટાડો થતો રહેશે.

તેમણે કહ્યું કે, તારીખ 28, 29 અને 30 જાન્યુઆરીમાં માવઠું થવાની શક્યતા છે. જેમાં પંચમહાલ, વડોદરા, મધ્ય ગુજરાતમાં માવઠાની શક્યતા છે. આ સાથે ઉત્તર ગુજરાતના કેટલાક ભાગોમાં પણ માવઠું થઈ શકે છે. માવઠાની અસર વડોદરા, પંચમહાલની સાથે અમદાવાદના ભાગો સુધી થઈ શકે છે.

અમદાવાદમાં અંબાલાલ પટેલે વાદળછાયું વાતાવરણ રહેવાની સાથે છાંટા પડવાની પણ સંભાવના વ્યક્ત કરવામાં આવી છે. આ સાથે દક્ષિણ ગુજરાતના ભાગોમાં પણ હવામાનમાં પલટો આવી શકે છે. ફેબ્રુઆરીમાં પણ હવામાનમાં પલટો આવવાની સંભાવના છે.

ગુજરાત સહિત દેશના ઉત્તર પર્વતીય પ્રદેશો અને પંજાબ, હરિયાણા, રાજસ્થાન, દિલ્હી, બિહાર, પૂર્વીય ઉત્તરપ્રદેશ વગેરે ભાગોમાં કમોસમી વરસાદ થવાની શક્યતા છે. આ સાથે દેશના ઉત્તર ભાગના રાજ્યોમાં ભારે હિમવર્ષાની પણ સંભાવના અંબાલાલ પટેલે વ્યક્ત કરી છે.