સુરતમાં કોરોના મહામારી વચ્ચે 20 લોકોની હાજરીમાં લગ્ન થશે, બન્ને તરફથી 8-8 લોકો હાજર રહેશે

કિર્તેશ પટેલ, સુરત : કોરોના સંક્રમણનો બીજો તબક્કો શરૂ થયો છે. બીજી તરફ દેવ ઉઠી એકાદશી બાદ લગ્નની સિઝન શરૂ પણ થઈ રહી છે. સરકારે 200 લોકોની જગ્યાએ 100 લોકોની મર્યાદામાં લગ્ન કરવા માટેનું નોટિફિકેશન બહાર પાડ્યું છે. જેથી મર્યાદિત સંખ્યામાં કેમ લગ્ન કરવા તેને લઈને લોકો મુશ્કેલીમાં મુકાયા છે. પરંતુ સુરતના લંબે હનુમાન રોડ પર રહેતા પરિવારે પોતાના દીકરાના લગ્ન 20 લોકોની હાજરીમાં કરવાનું નક્કી કર્યું છે. બન્ને પક્ષે 8-8 લોકો હાજર રહેશે અને એ રીતે 20 લોકોની હાજરીમાં લગ્ન કરીને વર્તમાન સમયમાં પ્રસંગ કેમ ઉકેલવો તેનું ઉદાહરણ પુરૂં પાડી રહ્યાં છે.

સુરતના વરાછા વિસ્તારમાં લંબે હનુમાન રોડ પર આવેલા જે.બી.ડાયમંડ સર્કલ પરની સૈફી સોસાયટીમાં રહેતા પ્રવિણભાઈ અને ઈન્દુબેન પટેલના પુત્ર વિરાટના લગ્ન 26મી નવેમ્બરના રોજ સવારે 10 વાગ્યે સીમાડા ચાર રસ્તા બી.આર.ટી.એસ. જંકશન રામકથા રોડ હપાણી ફાર્મમાં પ્રવિણભાઈ નારાણભાઈ રામાણીની દીકરી મીરલ સાથે નિર્ધાર્યા છે.

લગ્ન અગાઉ બન્ને વેવાઈઓએ સ્થિતિને અનુરૂપ 20 લોકોની હાજરીમાં લગ્ન કરવાનું આયોજન કર્યું છે. અમે વર્તમાન પરિસ્થિતિને ધ્યાનમાં રાખી છે. સામાજિક આગેવાન હોવાથી અન્ય લોકોના સ્વાસ્થ્યની ચિંતા કરીને બન્ને પક્ષના 8-8 લોકો હાજર રહેશે. ગોર મહારાજ અને કેમેરામેન સહિતના 20 લોકો સાથે લગ્ન કરવામાં આવશે.

શ્રી સૌરાષ્ટ્ર પટેલ સેવા સમાજના કાનજીભાઈ ભાલાળાએ કહ્યું કે વર્તમાન સ્થિતિમાં ઓછા લોકો સાથે લગ્ન કેવી રીતે કરી શકાય તેનો આ બન્ને વેવાઈઓએ દાખલો બેસાડ્યો છે. સમાજ તરફથી અમે તેમને શુભેચ્છા અને અભિનંદન પાઠવીએ છીએ. અન્ય લોકોએ પણ આ લગ્નમાંથી શીખ લેવાની જરૂરી છે.