નવસારી : અંગ્રેજી મીડિયમમાં ભણતી સગીર યુવતીને મજૂર યુવાન સાથે થયો પ્રેમ, ઘરેથી ભાગી ગઈ

ભાવિન પટેલ, નવસારી : સમાજમાં સોશિયલ મીડિયાને કારણે કેટલીક સારી બાબતો સામે આવી રહી છે તો કેટલીક ખરાબ બાબતો પણ સામે આવી રહી છે. નવસારીમાં માતા-પિતા માટે લાલબત્તી સમાન કિસ્સો આવ્યો સામે છે. નવસારીમાં રહેતી સગીર યુવતીને સોશિયલ મીડિયાના માધ્યમથી સુરતના મજૂર યુવાન સાથે ઓનલાઇન પ્રેમ થયો હતો. આ પ્રેમના કારણે સગીર યુવતી યુવાન સાથે સુરત ભાગી ગઇ હતી. જોકે નવસારી પોલીસે 5 દિવસે પ્રેમી યુવાનની ધરપકડ કરી લીધી છે.

નવસારીમાં રહેતી 17 વર્ષીય સગીરા માતા અને ભાઈ સાથે રહે છે. વર્ષો પહેલા પતિને ગુમાવનાર માતા ખાનગી નોકરી કરીને માંડ માંડ બે છેડા ભેગા કરીને દીકરીને અંગ્રેજી માધ્યમમાં ભણાવે છે. હાલમાં સ્કૂલમાં શિક્ષણ કાર્ય બંધ હોવાથી સગીરા ઘરે રહીને જ ઓનલાઇન ભણતી હતી.

આ દરમિયાન સોશિયલ મીડિયાના માધ્યમથી સગીર યુવતીને સુરતના 19 વર્ષીય મજૂર દર્શન રાઠોડ સાથે પ્રેમ પાંગર્યો હતો. ધો. 12માં અંગ્રેજી માધ્યમમાં ભણતી સગીર યુવતી પ્રેમમાં ભાન ભૂલીને મજૂર યુવાન સાથે ઘર છોડીને ભાગી ગઈ હતી.

સગીરાની માતાએ નવસારી ટાઉન પોલીસ મથકમાં ગુમ થયાની ફરિયાદ કરતા પોલીસે પાંચ દિવસ બાદ સગીર યુવતી અને યુવકને શોધીને યુવક વિરુદ્ધ પોસ્કો એકટ હેઠળ ગુનો નોંધ્યો છે.