Corona Vaccine: સુરતનાં 7 વર્ષનાં હ્રીધાન પટેલે ઇઝરાયેલ જઇ લીધી પહેલી કોરોના વેક્સિન

સુરત: ભારતમાં બાળકોની વેક્સિનને (Corona Vaccine)લઈને હજી કોઈ નિર્ણય જોવા મળ્યો નથી ત્યારે બીજી તરફ ઇઝરાયલમાં બાળકોને વેક્સિનનો પ્રથમ ડોઝ આપવા કેમ્પેઈન શરૂ કરાયું છે. જો કે આ વચ્ચે ઈઝરાયલમાં (Israel)રહેતા સુરતી પરિવારનો ઉદાહરણ રૂપ કિસ્સો જોવા મળ્યો છે. કોરોનાને કારણે ઇઝરાયેલથી સુરત પરત ફરેલા પરિવારે ઇઝરાયલમાં બાળકોની વેક્સિન શરૂ થતા 7 વર્ષના પુત્રને ફરીથી લઈ જઈ વેક્સિન મુકાવી છે.

92 લાખ જેટલી જનસંખ્યાવાળા ઈઝરાયલમાં બાળકોને વેક્સિના આપવાની પ્રક્રિયા પુરજોશમાં શરૂ છે અને 5-11 વર્ષના અંદાજીત 3.3% બાળકોએ અને 12 થી 15 વર્ષના 58.6% બાળકોએને ઓછામાં ઓછો એક શોટ મેળવ્યો છે અને 47.7% એ બે ડોઝ મેળવ્યા છે. ત્યારે કોરોનાને કારણે સુરત ફરેલા માતા-પિતાએ ફરીથી ઇઝરાયલ જઈને તેમના 7 વર્ષના પુત્ર હ્રીધાન પટેલને વેક્સિનનો પ્રથમ ડોઝ મુકાવ્યો છે.

માતા શિવાની અને પિતા અભિષેકનાં જણાવ્યા અનુસાર કોરોનાકાળમાં બાળકોની ચિંતા સતાવતી રહે છે. જેથી ઇઝરાયેલમાં વેક્સિનેશનની વાત સાંભળ્યા બાદ એક મહીના માટે ત્યાં ગયા છે.એટલું જ નહીં હ્રીધાને ભારતમાં પણ બાળકોને રસી આવે ત્યારે જલ્દી મુકાવવા અપીલ કરી છે અને સંભવતઃ તે વેક્સિન મુકનાર પ્રથમ સુરતી બાળક છે.

વેક્સિન લીધા હ્રીધાન પટેલે કહ્યું કે, હું સાત વર્ષનો છું અને સુરતમાં જી.ડી.ગોએન્કા ઈન્ટરનેશનલ સ્કૂલમાં ભણું છું. આ પેન્ડેમિક સિચ્યુએશનમાં આપણે વેક્સિન લેવી જરૂરી છે. મેં ઈઝરાયેલમાં વેક્સિનનો પ્રથમ ડોઝ લીધો છે અને હું એકદમ સ્વસ્થ છું.

જ્યારે આપણા દેશમાં બાળકોની વેક્સિન શરૂ થાય ત્યારે દરેકે બાળકે જરૂર થી લેવી જોઈએ. કોરોના સામે લડવા માટે વેક્સિન ખૂબ જ જરૂરી છે.

ઇઝરાયેલમાં કોરોનાની વેક્સીન લીધા બાદ પોઝ આપતો હ્રીધાન પટેલ