વડોદરા: હોસ્પિટલમાં વેન્ટિલેટર પર બાળક હતું ત્યારે જ ધડામ કરતી છત પડી!

વડોદરાઃવડોદરાની સયાજી હોસ્પિટલમાં વેન્ટિલેટર પર બાળક હતુ ત્યારે અચાનક છતની પીઓપી તુટી પડી હતી. જો કે બાળકનો ચમત્કારીક બચાવ થયો હતો. મોટી હોનારત ટળી હતી.

વેન્ટિલેટર પર સારવાર લેતા એક બાળદર્દી પર પીઓપીની છત તૂટી પડી હતી. જો કે છતનો કેટલોક હિસ્સો બાળક પર પડતા બાજુમા બેઠેલ તેની માતાએ તેને ઉંચકીને ખસેડી લીધો હતો. જેથી અન્ય કેટલોક ભાગ વેન્ટિલેટર પર પડ્યો હતો. આ ઘટનામાં બાળકનો આબાદ બચાવ થયો હતો. ઉપર લગાવેલો પંખો પણ વળી ગયો હતો.

સયાજી હોસ્પિટલના બાળરોગ વિભાગના પીડીયાટ્રીક વોર્ડમાં સારવાર લઇ રહેલા બાળક પર છત નીચે લગાવેલ પીઓપી એકાએક પડ્યું હતું. તે સમયે બાળકના પરિવારજનો પણ હાજર હતા.સદનસીબે ઘટનામાં બાળક અને પરિવારજનોનો આબાદ બચાવ થતા મોટી હોનારત ટળી હતી.સારવાર હેઠળ બાળકને બાદમાં અન્ય વોર્ડમાં ખસેડાયો હતો.

પીડીયાટ્રીક વોર્ડની છત છેલ્લા ઘણા સમયથી જર્જરીત હાલતમાં હતી જેની ફરીયાદ પણ હોસ્પિટલ તંત્રને વારંવાર કરાઈ હતી તેમ છતાં પણ કુભકર્ણની નિદ્રામાં સુતા હોસ્પિટલના સત્તાધીશોના પેટનું પાણી ન હાલ્યું અને આખરે જે ભીતી હતી તે મુજબ જ પીડીયાટ્રીક વોર્ડની છત ધડાકાભેર ધરાયાશી થઈ હતી.