ટ્રિપલ તલાકમાં સજાનો ગુજરાતમાં પ્રથમ કિસ્સો: ક્લાસ 1 અધિકારીએ પત્નીને ત્રણવાર તલાક કહી હિન્દુ યુવતી સાથે લગ્ન કરી લીધા 

કિશોર તુવર, બનાસકાંઠા: ત્રિપલ તલાક (triple talaq) મામલે કેન્દ્ર સરકારે નવા બનાવેલા કાયદા બાદ પાલનપુર (Palanpur) પશ્ચિમ પોલીસ મથકે એક મુસ્લિમ મહિલાએ પતિ દ્વારા અપાયેલા ત્રિપલ તલાકને લઈને ફરિયાદ નોંધાવી હતી. જે મામલો પાલનપુર કોર્ટમાં ચાલી જતા આરોપી પતિને કોર્ટે એક વર્ષની કેદ તેમજ પાંચ હજાર રૂપિયાનો દંડ ફટકાર્યો છે. નોંધનીય છે કે, ટ્રિપલ તલાક વિરોધી કાયદો બન્યા બાદ ગુજરાતમાં (triple talaq sentenced first case in Gujarat) પ્રથમ સજાનો કિસ્સો છે.

પાલનપુર તાલુકાના હેબતપુરના રહીશ સરફરાઝખાન બીહારી દાંતીવાડા સીપુ નીગમ ડેપ્યુટી એન્જિનિયર તરીકે ફરજ બજાવે છે. જેના લગ્ન વડગામની જુની નગરીની સહેનાજબાનુ સાથે થયા હતા. લગ્ન જીવનથી સહેનાજબાનુને એક પુત્રી મન્નતનો જન્મ થયેલો.

સરફરાઝખાન દાંતીવાડા સીપુ ડેમના ડેપ્યુટી એન્જિનિયર તરીકે નોકરી કરતા હોવાથી તેઓની સાથે નોકરી કરતી હિંદુ યુવતી દીપીકા રાઠોડને લઇને ભાગી જઈ તેની સાથે લગ્ન કર્યા હતા.

જે બાદ ત્રણ વાર તલાક તલાક તલાક બોલીને ઘરમાંથી પુત્રી સાથે પત્ની સહેનાજબાનુંને કાઢી મૂકી હતી. આ મામલે સહેનાજબાનુએ પાલનપુર પશ્ચિમ પોલીસ સ્ટેશનમાં ઈપીકો કલમ ૪૯૮(ક), ૩૨૩, ૨૯૪, ૫૦૪, ૫૦૬(૨) ની તેમજ મુસ્લિમ પ્રોટેક્શન ઓફ એકટ ૩,૪ મુજબ ની ફરીયાદ કરી હતી.

જે મામલે પાલનપુરની બીજા એડિશનલ કોર્ટે આરોપીને એક વર્ષની સજા અને પાંચ હજારનો દંડ ફટકાર્યો છે. આમ ગુજરાતમાં ત્રિપલ તલાકનો કાયદો બન્યા બાદ પાલનપુરની કોર્ટની આ ટ્રિપલ તલાક ના કાયદામાં પ્રથમ સજા છે.

કાયદો બન્યા બાદ પાલનપુર કોર્ટે આરોપીને 1 વર્ષની કેદ અને 5 હજાર દંડ ફટકાર્યો છે. કલાસ 1 અધિકારીએ પત્નીને 3 વાર તલાક કહી કાઢી મૂકી હતી. આરોપીએ પત્ની અને દીકરીની હયાતીમાં  હિન્દૂ યુવતી સાથે લગ્ન કર્યા હતા. પાણી પુરવઠા વિભાગમાં કલાસ 1 તરીકે ફરજ બજાવતા અધિકારી સરફરાઝ બિહારીને સજા.

ગુજરાતમાં ટ્રિપલ તલાકના કેસમાં આરોપીને સજા પડી હોય તેવો રાજ્યનો આ પ્રથમ કેસ છે. ટ્રિપલ તલાકના કાયદા સાથે પતિ સામે કોર્ટમાં કેસ કરીને જીતનાર પત્નીને ત્રણ વર્ષે ન્યાય મળતા પીડિત પત્નીએ ટ્રિપલ તલાકનો કાયદો ઘડનાર મોદી સરકારનો આભાર માન્યો હતો.  પીડિતાએ કહ્યું હતું કે, જો કાયદો ન હોત તો મારી હાલત ખરાબ થઈ જાત. મારા જેવી અનેક છોકરીઓ છે જે હજી પણ પીડિત છે, તેઓને ન્યાય મળવો જોઈએ.