મોરબીમાં સ્થાનિક પોલીસને ઊંઘતી રાખી સ્ટેટ મોનિટરીંગ સેલનો સપાટો, દારૂ ભરેલો ટ્રક ઝડપાયો

અતુલ જોશી, મોરબી: સ્થાનિક પોલીસને ઊંઘતી રાખી સ્ટેટ મોનીટરીંગ સેલે મોરબીમાં સપાટો બોલાવ્યો છે. લાખો રૂપિયાનો વિદેશી દારૂ ભરીને જતા ટ્રકને ઝડપી પાડવામાં આવ્યો છે. જેમાંથી 250 પેટી વિદેશી દારૂ મળી આવ્યો છે. બાતમીના આધારે પકડાયેલા દારૂ ભરેલા ટ્રક મામલે વધુ તપાસ શરુ કરવામાં આવી છે. 

મોરબીના શનાળા ગામ નજીક સ્ટેટ મોનિટરીંગ સેલ દ્વારા વોચ ગોઠવીને દારૂનો જથ્થો ઝડપી પાડવામાં આવ્યો છે. દારૂ અને ટ્રક સહિત 19.31 લાખના મુદ્દામાલ સાથે આઈMર ચાલકની ધરપકડ કરવામાં આવી છે તેમજ આઠ ઇસમોને વોન્ટેડ જાહેર કરવામાં આવ્યા છે.

મળતી માહિતી અનુસાર, મોરબીમાં સ્ટેટ મોનીટરીંગ સેલ દ્વારા મોરબી A-ડિવિઝન પોલીસ મથક વિસ્તારમાં આવતા શનાળા ગામ નજીકથી 250 પેટી વિદેશી દારૂ ભરેલ આઇશર પકડી પાડ્યું છે. અને 12,18,380 રૂપિયાનો દારૂ, 7330 રૂપિયા રોકડા, રૂપિયા 5000નો એક મોબાઈલ ફોન તથા આઇસર ટ્રક રૂપિયા 7 લાખ મળી કુલ 19,31,190 રૂપિયાનો મુદ્દામાલ કબજે કરાયો છે. તેમજ આઇસર ચાલક કલ્પેશ ઉર્ફે લાલો હર્ષદભાઈ લગારિયા (રહે.જૂનાગઢ)ની ધરપકડ કરાઈ છે.

ડ્રાઈવરની પૂછપરછ કરતા વિદેશી દારૂ મંગાવનાર ધીરેન અમૃતલાલ કારિયા (રહે.જૂનાગઢ), શ્યામ આહીર (રહે ગોંડલ), ધીરેન કારિયાનાં ડ્રાઈવર ઉદય દવે (રહે.જૂનાગઢ), ડ્રાઈવર રાહુલ અને આઇસર માલિક તેમજ દારૂ મંગાવનાર અને મોકલનાર મળી કુલ આઠ શખ્સોના નામ ખુલતા તેઓને  વોન્ટેડ જાહેર કરી તમામની શોધખોળ હાથ ધરવામાં આવી છે.

ઉલ્લેખનીય છે કે, આરોપી ધીરેન કારિયા અને કલ્પેશ હર્ષદભાઈ લગારીયા વિરૂદ્ધ ભૂતકાળમાં પણ ગુનાઓ નોધાઇ ચૂક્યા છે. ત્યારે સ્ટેટ મોનીટરીંગ સેલે મોરબી શહેર એ ડિવિઝન પોલીસ મથકે તમામ વિરુદ્ધ ગુનો નોંધી આગળની તજવીજ હાથ ધરી છે.

આ કામગીરીમાં સ્ટેટ મોનીટરીંગ સેલના એસપી નિર્લિપ્ત રાયની સુચનાથી ડીવાયએસપી કેટી કામરિયાના માર્ગદર્શન હેઠળ પીએસઆઇ આરએ જાડેજાની ટીમ દ્વારા આઇસર ટ્રક પકડી પાડવામાં આવ્યો હતો. રાજકોટના પડધરી નજીકથી પણ આ જ આરોપીઓની 144 પેટી ભરેલ બોલેરો કારને પણ સ્ટેટ મોનીટરીંગ સેલની ટીમે દરોડા પાડી પકડી પાડવામાં આવ્યા છે.

ઉલ્લેખનિય છે કે આ દારૂ મંગાવનાર ધીરેન કારિયા મૂળ જૂનાગઢનો છે અને આગાઉ પણ અનેક વખત વિદેશી દારૂના ગુનામાં પોલીસ ચોપડે ચડી ચૂક્યો છે ત્યારે મોડી રાત્રીના જુદી જુદી બે જગ્યાએ મળી રાજ્યની સ્ટેટ મોનીટરીંગ સેલને કુલ 544 પેટી વિદેશી દારૂ નો જથ્થો પકડી પાડવામાં સફળતા મળી છે.