વાસણા બેરેજમાં પાણીના સ્ટોરેજથી અમદાવાદના 111 ગામોને પાણી મળશે

ગુજરાતના ગામે-ગામ પાણી પહોંચાડવા માટે રાજ્ય સરકાર કટિબદ્ધ છે ત્યારે નર્મદા ડેમમાં પાણીની થતી સતત આવકને કારણે નર્મદા ડેમમાંથી અંદાજે ૩૩૦૦ ક્યુસેક જેટલું પાણી સાબરમતી નદીમાં છોડવામાં આવી રહ્યું છે.

આ પાણી કરાઇ ગામમાંથી પસાર થતી સાબરમતી એસ્કેપ મારફતે સાબરમતી નદીમાં ઠલવાઇ રહ્યું છે. સાબરમતી નદીમાં છોડવામાં આવેલ નર્મદાના પાણી વાસણા બેરેજ ખાતે મોટાપાયા પર સંગ્રહીત થાય છે.

આ બેરેજ ખાતે સંગ્રહીત થયેલા પાણીના જથ્થાને સાબરમતી નદીના ડાઉન સ્ટ્રીમમાં આવેલા ગામોમાં ખેડૂતો દ્વારા વાવવામાં આવેલ ડાંગર અને ઘઉંના ખેતરમાં સિંચાઇ માટે ફતેહવાડી કેનાલ મારફતે છોડવામાં આવે છે.

હાલ વાસણા બેરેજમાં પાણીની આવક વધતા બે દરવાજા ખોલીને ૧,૫૦૦ ક્યુસેક જેટલું પાણી છોડવામાં આવી રહ્યું છે. ફતેહવાડી કેનાલ મારફતે છોડવામાં આવેલા પાણી દ્વારા ૮૨ હજાર એકર જેટલી જમીનમાં સિંચાઇ શક્ય બની છે.

અમદાવાદ જિલ્લાના દસક્રોઇ, સાણંદ, બાવળા, ધોળકા અને વિરમગામ તાલુકાના ૧૧૧ ગામોને ડાંગર તેમજ ઘઉંમાં સિંચાઇ માટે પાણી ઉપલબ્ધ બન્યું છે.

અમદાવાદ ખાતે સાબરમતી નદી પર સને ૧૯૭૬માં આડબંધ બાંધવામાં આવ્યો હતો, જે આજે વાસણા બેરેજ તરીકે ઓળખાય છે. સાબરમતી નદીમાંથી વહી જતા પાણીને વાસણા બેરેજ ખાતે રોકવામાં આવે અને ત્યાં સંગ્રહીત થયેલું પાણી સાબરમતીની ડાઉન સ્ટ્રીમમાં આવતા તાલુકા અને ગામોમાં સિંચાઇ માટે ફતેહવાહી નહેર મારફતે પૂરૂ પાડવામાં આવે છે.

વાસણા બેરેજમાં પાણીના સંગ્રહને કારણે જ અમદાવાદ ખાતેનો વિશ્વ પ્રસિદ્ધ રિવરફ્રન્ટ રમણીય અને પાણીથી છલોછલ બારેમાસ જોવા મળે છે. નદીમાં બારેમાસ પાણી રહેવાને કારણે રિવરફ્રન્ટની આજુબાજુના વિસ્તારોમાં પાણીના સ્તરમાં પણ વધારો થયો છે.

રિવરફ્રન્ટની આસપાસમાં વસતા લોકો સેવા વસ્તીની રોજ બરોજની પાણીની જરૂરિયાત પણ રિવરફ્રન્ટના પાણીના લીધે સંતોષાય છે.

આ ઉપરાંત અમદાવાદના વિવિધ વિસ્તારોને પાણી પૂરું પાડવા માટે સાબરમતી નદીમાં બનાવેલા ફેંચવેલમાં મોટાપ્રમાણમાં પીવાનું પાણી ઉપલબ્ધ થાય છે. જેને ટ્રીટ કર્યા બાદ શહેરીજનોને પીવાનું પાણી પૂરૂ પાડવામાં આવે છે.