વડોદરાની કંપનીએ ભારતીય સેનાના જવાનો માટે બનાવી 'ઇવેક્યુએશન બેગ', વિદેશથી 1 લાખમાં આવતી બેગ 25 હજારમાં બનાવી

અંકિત ઘોનસિકર, વડોદરા: યુક્રેન અને રશિયા (Ukraine Russia War) વચ્ચે ચાલી રહેલા યુદ્ધ વચ્ચે આાગામી સમયને ધ્યાનમાં રાખી બાયોલોજિકલ વોર અને કોરોના જેવી મહામારીમાં ભારતીય સેનાના જવાનો માટે વડોદરાની (Vadodara News) કંપનીએ વિશેષ સૂટ તૈયાર કર્યો છે. ‘ઇવેક્યુએશન બેગ’ (evacuation bag) તરીકે ઓળખાતા આ સૂટ અગાઉ રૂ. એક લાખના ભાવે વિદેશથી મંગાવાતા હતા. પરંતુ આ સ્વદેશી કંપનીએ કાપડ અને ખાસ રબરમાંથી આ વિશેષ સૂટ તૈયાર કરવા આવ્યો છે. ભારતમાં આ સુટના ઉત્પાદનથી સૂટની કિંમત ફક્ત રૂ. 25 હજાર છે. જેના કારણે ભારતીય સેનાએ પણ ઘણો આર્થિક ફાયદો થયો છે. અત્યાર સુધી ભારતીય સેનાને આવા 500 સૂટ સપ્લાય કરાયા છે.

વડોદરાના છાણી અને રણોલી ખાતે કાર્યરત સ્યોર સેફ્ટી ઇન્ડસ્ટ્રીઝ પ્રાઇવેટ લિમિટેડ દ્વારા ફેબ્રુઆરી 2020માં મહામારી વખતે આ ઈવેક્યુએશન બેગ ડિઝાઈન કરાઈ હતી.

સ્મોલ સ્કેલ ઈન્ડસ્ટ્રીઝમાં તૈયાર થયેલી આ બેગ કોરોના સંક્રમિત ભારતીય જવાનોને સિયાચેન ગ્લેશિયર અને જેસલમેર જેવા રેતાળ પ્રદેશમાંથી એરલિફ્ટ કરવા પણ કારગર સાબિત થઈ હતી.

ઈવેક્યુએશન બેગની ખાસિયત એ છે કે, આગામી સમયમાં બાયોલોજિકલ વોરમાં પણ તેનો ઉપયોગ થઈ શકે એમ છે. અહીં ડીઆરડીઓની મદદથી ટેન્ટ તેમજ ડોક્ટરો માટેના સૂટ પણ તૈયાર કરાયા છે, 10 જેટલા ટેન્ટ ભારતીય સેનાને આપ્યા છે.  એરફોર્સ, નેવી, તેમજ બીજા પેરા મિલિટરી ફોર્સને પણ ઓર્ડર આવે તેવી સંભાવના પણ કંપની સંચાલકે વ્યક્ત કરી હતી. આ સૂટ કોરોનાની મહામારીમાં ખૂબ ઉપયોગી સાબિત થયા છે.

ટેક્સટાઇલ મિનિસ્ટ્રીની મંજૂરી બાદ કંપનીએ ઈવેક્યુએશન બેગનું ઉત્પાદન શરૂ કર્યું હતું. આ સૂટ ખાસ કાપડ અને રબરમાંથી તૈયાર કરાયો છે. તેના કારણે દર્દીનો ચેપ બીજાને નથી લાગતો. ડોક્ટરો પણ તેનો ઉપયોગ કરીને સુરક્ષિત રહી શકે છે. હાલ આ કંપની માત્ર સુરક્ષા સંબંધિત ચીજવસ્તુઓનું જ ઉત્પાદન કરે છે.

જોકે, અહીં ઉત્પાદિત ચીજો ડિફેન્સ સિવાય અન્ય કોઈને વેચાતી નથી, પરંતુ ડીઆરડીઓ મંજૂરી આપે તો તે વિદેશમાં નિકાસ કરી શકાય છે. જો ઈવેક્યુએશન સૂટ પણ નિકાસ કરવાની મંજૂરી મળશે, તો કંપનીને અને સરકારને પણ આવક થશે.