અમદાવાદમાં બોગસ મીનરલ વોટર વેચવાનું કૌભાંડ, રોજનું લાખો લીટરનું વેચાણ

અમદાવાદ શહેરમાં મીનરલ વોટરના નામે બોગસ પાણીનો વેપારી ખુબ જ ફુલ્યો ફાલ્યો છે. મીનરલ વોટરના નામે વેપારીઓ ગ્રાહકો સાથે ઠગાઈ કરી અને તગડી કમાણી કરી રહ્યાં છે. આરોગ્ય વિભાગ આ ગોરખધંધા સામે કુંભકરણની નીંદ્રામાં હોય તેવું લાગે છે.

પાણીની ઉંચી કીંમત ચુકવ્યા બાદ પણ લોકો બોગસ મીનરલ વોટર મેળવી રહ્યા છે. વેપારીઓ પાણીને માત્રને માત્ર ઠંડુ કરી બ્રાન્ડેડ પાણીની બોટલોની જેમ ઉંચી કીમતે લોકોને પધરાવી રહ્યા છે. જ્યારથી શહેરમા પાણીના પાઉચ બંધ થયા છે, ત્યારથી નાની મોટી પાણીની બોટલો નો ધંધો પૂરબહારમાં ખીલ્યો છે. બસ ડેપો અને કાલુપુર રેલવે સ્ટેશન આ ગોરખધંધાનું એ.પી. સેન્ટર છે.

ન્યૂઝ 18એ શહેરના આવા જ એક બોગસ મીનરલ વોટર ઉત્પાદન કરતા પ્લાન્ટને ઝડપી પાડ્યો હતો જ્યાં બોગસ મીનરલ વોટરનું ઉત્પાદન થઈ રહ્યું હતું. બ્રાન્ડે વોટર બોટલના નામે ડુપ્લીકેટ ઉત્પાદન કરી એસ.ટી. મથક અને રેલવે સ્ટેશન પર વેચાણ કરવામાં આવે છે.

શહેરના ગીતા મંદિર એસ.ટી. મથક ખાતે મીનરલ વોટરના વેચાણ પર ખતરનાક સ્કીમ ચાલી રહી છે. અહીંયા એક બોટલની ખરીદી પર એક મફત આપવામાં આવે છે. આ બોટલોનો ભાવ બ્રાન્ડેડ મીનરલ વોટર જેટલો જ હતો પરંતુ તેની ગુણવત્તા સામે અનેક પ્રશ્નાર્થો સર્જાય છે.

આપ માર્કેટમાંથી પાણીની બોટલો લઈ રહ્યા છો પહેલાં બોટલ પર આઈ.એસ.આઈ માર્કો કેપ સિલીંગની ચકાસણી કરવી જરુરી બને છે. પૅકેજીંગ ડ્રીન્કીંગ પ્લાન્ટ ઑનર્સ એસોસિએશનના પ્રમુખ અલ્કેશ પટેલે જણાવ્યું, ' અમદાવાદ અને ગુજરાતમાં નોન આઈ.એસ.આઈ ગેરકાયેદસર પૅકેજીંગ ડ્રીન્કીંગ વોટર પ્લાન્ટનો રાફડો છે અને તેની સંખ્યા ઘણી વઘુ છે. રાજ્યમાં આઈ. એસ. આઈ. નો થપ્પો ધરાવતાં 450 ઉત્પાદક પ્લાન્ટો છે. આ માર્કો લગાડવાની ફી પણ સવા લાખ રૂપિયા જેટલી હોય છે.