અમદાવાદ: ભૂલકાઓની સુરક્ષા માટે RTOએ ફરી હાથ ધરી શાળા વરધી વાહનોની તપાસ

આજે ત્રીજી વખત અમદાવાદની વિવિધ શાળાઓની બહાર RTOની ટ્રાફિક ડ્રાઈવ વહેલી સવારથી શરૂ થઇ ગઇ છે. RTOની 12 ટીમો અને 36 અધિકારીઓ દ્વારા અલગ અલગ સ્થળો પર ચેકિંગ હાથ ધરાયું છે. જેમાં સ્કૂલ બસ, વાન અને રિક્ષાની ફિટનેસ તપાસવામાં આવી રહી છે. જેમાં શહેરની 15 શાળાઓમાં આ તપાસ હાથ ધરાશે. તેનો હેતુ બાળકોની સલામતી સામે કોઇ ચેડા નથી થતાં તે જ જોવાનો છે.

આ ટ્રાફિક ડ્રાઇવમાં સ્કૂલ બસ, વાન અને રિક્ષાના ફિટનેસ સર્ટિફિકેટ, ગેસકીટ ઉપરાંત તેમની પાસે શાળા માટે વાહન ચલાવવાની મંજૂરી છે કે નહીં તે પણ જોવામાં આવશે. કેપિસિટી કરતા વધારે બાળકો બેસાડતા વાહન ચાલકો સામે કાર્યવાહી કરવામાં આવી રહી છે.

સ્કૂલ વાન માટે આરટીઓએ કેટલાક નિયમો ફરજિયાત કર્યા છે, જે મુજબ સ્કૂલ વાનમાં 12 વર્ષથી નીચેનાં બાળકોની સંખ્યા 12 અને તેથી વધુ વર્ષનાં હોય તેવા છ બાળકો બેસાડી શકાય, જ્યારે રિક્ષામાં 12 વર્ષથી નીચેનાં છ અને તેનાથી વધુ ઉંમરનાં ત્રણ બાળકો જ બેસાડી શકાય છે, પણ આ નિયમોનું પાલન વાન અને રીક્ષા ચાલકો કરતા નથી માટે તેમની સામે આકસ્મિક તપાસ શરૂ કરી દંડની કાર્યવાહીને વેગ આપવામાં આવ્યો છે

આરટીઓને ફરજિયાત ડ્રાઇવ કરવાનો આદેશ આવતાં તંત્ર દોડતું થયું છે. કમિશનર ઓફ ટ્રાન્સપોર્ટ દ્વારા રાજ્યના તમામ શહેરમાં સ્કૂલ વાન સામે ઝુંબેશ શરૂ કરવા આદેશ કરવામાં આવ્યો છે. રાજ્ય સરકારનો આદેશ છે. આખા રાજ્યમાં ડ્રાઇવ થશે. આગામી 16મી સુધી આ ઝુંબેશ ચલાવાશે.

અધિકારીઓનું કહેવું હતું કે, તેમને ફરિયાદ મળતી હોય છે કે વાન કે રિક્ષામાં ચાલકો કેપેસિટી કરતાં અને મંજૂરી હોય તેના કરતાં વધારે બાળકો બેસાડતા હોય છે. જેથી આવા લોકો સામે પણ જરૂરી કાર્યવાહી અને દંડ ફટકારવામાં આવશે.

નોંધનીય છે કે AMC દ્વારા 2 ઓગસ્ટથી 12 ઓગસ્ટ સુધીની કામગીરીનો રિપોર્ટ રજૂ કરવામાં આવ્યો હતો. આ રિપોર્ટમાં દાવો કરવામાં આવ્યો કે 29,529 દબાણો દૂર કરવામાં આવ્યા છે, જ્યારે 92,000 ચોરસ મીટર જગ્યા ખુલ્લી કરવામાં આવી હતી.