અમદાવાદ: સ્કૂલ વરધીના વાહનો પર RTOની તવાઇ, હાથ ધરાયું ચેકિંગ

આજે વહેલી સવારથી શહેરમાં RTOની 10 ટીમો દ્વારા ટ્રાફિક ડ્રાઈવનું આયોજન કરવામાં આવ્યું છે. આરટીઓ અને પોલીસના અધિકારીઓ દ્વારા સ્કૂલમાં વર્ધીમાં જતા વાહનો એટલે સ્કૂલ વાન, સ્કૂલ રિક્ષા અને સ્કૂલ બસની તપાસ હાથ ધરવામાં આવી છે. જેમાં ભુયંગદેવ, ઘાટલોડિયા, સાબરમતી સહિતના વિસ્તારમાં આ તપાસ કરવામાં આવી રહી છે. જેમાં જે તે વાહનનું ફિટનેસ ચેકિંગ હાથ ધરાયું છે. તેનો મુખ્ય હેતુ બાળકોની સલામતી સામે કોઇ ચેડા નથી થતાં તે જ જોવાનો છે.

આ ટ્રાફિક ડ્રાઇવમાં સ્કૂલ વાનના ફિટનેસ સર્ટિફિકેટ, ગેસકીટ ઉપરાંત તેમની પાસે શાળા માટે વાહન ચલાવવાની મંજૂરી છે કે નહીં તે પણ જોવામાં આવશે. કેપિસિટી કરતા વધારે બાળકો બેસાડતા વાહન ચાલકો સામે કાર્યવાહી કરવામાં આવી રહી છે.

અધિકારીઓનું કહેવું હતું કે, તેમને ફરિયાદ મળી હતી કે વાન કે રિક્ષામાં ચાલકો કેપેસિટી કરતાં અને મંજૂરી હોય તેના કરતાં વધારે બાળકો બેસાડતા હોય છે. જેથી આવા લોકો સામે પણ જરૂરી કાર્યવાહી અને દંડ ફટકારવામાં આવશે.

આરટીઓને ફરજિયાત ડ્રાઇવ કરવાનો આદેશ આવતાં તંત્ર દોડતું થયું છે. કમિશનર ઓફ ટ્રાન્સપોર્ટ દ્વારા રાજ્યના તમામ શહેરમાં સ્કૂલ વાન સામે ઝુંબેશ શરૂ કરવા આદેશ કરવામાં આવ્યો છે. રાજ્ય સરકારનો આદેશ છે. આખા રાજ્યમાં ડ્રાઇવ થશે. આગામી 16મી સુધી આ ઝુંબેશ ચલાવાશે.

આ પહેલા પણ સી એન વિદ્યાલય, માઉન્ટ કાર્મેલ સહિત 12 સ્કૂલમાં RTO દ્વારા કાર્યવાહી કરવામાં આવી છે. RTOની અલગ અલગ 12 ટીમો દ્વારા આ કાર્યવાહી કરવામાં આવી છે.

જેમાં ટ્રાફિક ડ્રાઈવમાં 12 ટીમમાં 3 આરટીઓ અધિકારી સહિત 39 કર્મચારી દ્વારા ચેકીંગ હાથ ધરાયુ હતું. જેમાં આરટીઓ વિભાગ દ્વારા અમદાવાદની એ.જી ટીચર્સ સ્કૂલ માંથી 04 જેટલી સ્કૂલ વેન કબજે કરવામાં આવી.