બોપલમાં પતિ સાથે ઝઘડો થતાં પત્નીએ પ્રેમીને બોલાવી માર ખવડાવ્યો

અમદાવાદના બોપલ વિસ્તારમાં પતિ, પત્ની ઔર વોહનો કિસ્સો સામે આવ્યો છે. બોપસ વિસ્તારમાં રહેતી પરિણીતા ફોન પર પર વાત કરી રહી હતી તે સમયે તેના પતિએ તેને પૂછ્યું હતું કે, તું કોની સાથે વાત કરી રહી છે? આ વાતને લઇને પરિણીતા ઉશ્કેરાઇ હતી. એટલું જ નહીં, પરિણીતાએ તેના પ્રેમીને ઘરે બોલાવી પતિને માર મરાવ્યો હતો. આ અંગે બોપલ પોલીસે પ્રેમી સામે મારામારીનો ગુનો નોંધી વધુ તપાસ હાથ ધરી છે.

બોપલમાં રહેતા અને નવરંગપુરા વિસ્તારમાં સાડીનો શો રૂમ ધરાવતા રોહિતની પત્ની ઇશા તેના ફોન પર કોઈની સાથે વાત કરતી હતી. આ અંગે રોહિતે તેની પત્નીને પૂછ્યું હતું કે, તું કોની સાથે વાત કરી રહી છે? જે બાબતે પતિ-પત્ની વચ્ચે ઝઘડો થયો હતો. (પાત્રોના નામ બદલ્યા છે)

પતિ સાથે ઝઘડો થતાં ઇશાએ તેના પ્રેમી કમલને ફોન કરી કહ્યું હતું કે, રોહિત મારી સાથે ઝઘડો કરે છે. તું અહીંયા આવ. જે બાદ ઇશાનો પ્રેમી તાત્કાલિક પ્રેમિકાના ઘરે દોડી આવ્યો હતો અને તેના પતિ રોહિતને માર માર્યો હતો. આટલું જ નહીં, વચ્ચે પડેલાં સોસાયટીના સેક્રેટરીને કમલે માર માર્યો હતો.

ઉપરાંત કમલે રોહિતને ધમકી આપતાં કહ્યું હતું કે, તારી પત્ની મીના સાથે મારે બે-ત્રણ વર્ષથી સંબંધ છે જો તું આડો આવીશ તો જાનથી મારી નાખીશ.

આટલું જ નહીં, ઇશાએ પણ તેના પતિને ઘમકી આપી હતી કે, મારે કમલ સાથે બે-ત્રણ વર્ષથી સંબંધ છે. જો તું મને રોકીશ તો ઘરેલું હિંસાનો કેસ કરી દઇશ. આ અંગે રોહિતે બોપલ પોલીસમાં ફરિયાદ નોંધાવી છે.