હાર્દિકે જિગ્નેશ મેવાણીના ઘરે ચગાવી પતંગ, 'ચીનના મીત્રો હશે તેનો પતંગ દેશી દોરી કાપશે'

ન્યૂઝ18 ગુજરાતીઃ પાસ (પાટીદાર અનામત આંદોલન સમિતિ)ના નેતા હાર્દિક પટેલે અમદવાદ ખાતે જિગ્નેશ મેવાણીના ઘરે ઉત્તરાયણ પર્વની ઉજવણી કરી હતી. અહીં હાર્દિક અને જિગ્નેશે પતંગ ચગાવી હતી. સાથે જ મીડિયા સાથે વાતચીત કરતા બંને યુવા નેતાઓએ સવર્ણોને આપવામાં આવેલા 10 ટકા અનામતથી લઈને આગામી ચૂંટણીને લઈને ભાજપનો પતંગ કાપવાની વાત પણ કરી હતી.

સાહેબનો પતંગ કાપીશુંઃ આ પ્રસંગે વડગામથી અપક્ષ ધારાસભ્ય તેમજ દલિત નેતા જિગ્નેશ મેવાણીએ લોકોને ઉત્તરાયણની શુભેચ્છા પાઠવી હતી, તેમજ 2019ની લોકસભાની ચૂંટણીમાં 'સાહેબ'નો પતંગ કપાશે તેમ જણાવ્યું હતું. સાથે જ મેવાણીએ એમ પણ કહ્યું હતું કે હાલ ગુજરાતમાં અમારો પતંગ સારો ચગી રહ્યો છે, દિલ્હીમાં પણ ચગશે કે નહીં એ સમય જ બતાવશે.

ગુજરાત બધા કામમાં પ્રથમ : ગુજરાત દેશમાં સવર્ણ અનામતનો અમલ કરનારું પ્રથમ રાજ્ય બન્યું હોવા અંગે પૂછાયેલા પ્રશ્નના જવાબમાં હાર્દિકે કહ્યુ કે, 'બધા કામમાં ગુજરાત પહેલું જ હોય છે, ભ્રષ્ટાચારમાં પણ પહેલું, એન્કાઉન્ટર કરવામાં પહેલું, રાજદ્રોહ લગાવવામાં પહેલું, ઈબીસી લગાવવામાં પણ પહેલું હોય છે. હાલ આ મુદ્દે સુપ્રીમમાં પડતર હોવાથી સુપ્રીમનો ચુકાદો હકારાત્મક આવશે તો અમે સરકારના નિર્ણયનું સ્વાગત કરીશું.'

ચીનના મિત્રોની પદંગ દેશી દોરી કાપશેઃ મેવાણીએ 2019માં સાહેબનો પતંગ કાપવાની વાત કર્યા બાદ હાર્દિકે જણાવ્યું હતું કે આગામી દિવસોમાં ચીનના મિત્રો હશે તે તમામનો પતંગ દેશી દોરી કાપશે.

કોનો પતંગ કપાશે : હાર્દિકે જણાવ્યુ કે, 'અમે ખેડૂતોની વિરુદ્ધ હોય તેનો પતંગ કાપવા માટૈ તૈયાર છીએ. અમારો જે માંઝો છે એ બેરોજગારી, ભ્રષ્ટાચાર અને મોંઘવારીને કાપવા માટે છે. અમે કોઈના વિરુદ્ધમાં નથી પરંતુ સત્તાના વિરોધી એ માટે છીએ કારણ કે તેમણે લોકોને મૂર્ખ બનાવવાનું કામ કર્યું છે.'

સર્વણ અનામત પર હાર્દિકે શું કહ્યું : 'આ પહેલા આનંદીબેન સરકારે પણ 10 ટકા ઈબીસીનો અમલ કર્યો હતો. હાલ આ મુદ્દો સુપ્રીમ કોર્ટનો પડતર છે, સુપ્રીમના આખરી નિર્ણય બાદ અમે સ્વાગત કે ઇન્કાર કરીશું તે જણાવીશું. સરકાર આ કામ ત્રણ વર્ષ પહેલા કરવું જોઈતું હતું. તેમણે ઇમાનદારી સાથે આ કામ કરવું હોય તો પહેલા સંવિધાનમાં સંશોધન કરવું જરૂરી હતી. સરકાર આવું કરીને સવર્ણોના મત લેવા માંગે છે. આ એક જૂમલો છે, કમળનું ફૂલ દર વખતે જૂમલો રજૂ કરે છે.'