મહિસાગર: કોરોનાના કહેર વચ્ચે લગ્નમાં યોજાયો કમલેશ બારોટનો ડાયરો, બે હજારથી વધુ લોકો ભેગા થયા

રાજ્યમાં (Gujarat) એક તરફ કોરોનાનો (coronavirus) કહેર વ્યાપી રહ્યો છે અને અનેક ગામડાઓ સ્વૈચ્છિક લૉકડાઉન (lockdown) તરફ જઇ રહ્યાં છે. ત્યારે બીજી તરફ મહીસાગરના (Mahisagar) લુણાવાડામાં (Lunawada) ધામધૂમપૂર્વક રાકેશ સોલંકીનો લગ્ન (marriage) પ્રસંગ યોજવામાં આવ્યો હતો. જેમાં જાણીતા ટીમલી કલાકાર કમલેશ બારોટનો ડાયરો (Kamlesh Barot Dayro) પણ રાખવામાં આવ્યો હતો. જેમાં સેંકડો લોકોની ભીડ જોવા મળી છે. આ ભીડમાં નથી કોઇ સોશિયલ ડિસ્ટન્સ કે નથી મોટાભાગના લોકોએ માસ્ક પહેર્યા. હવે આટલી મોટા પ્રમાણમાં ભેગી થયેલી ભીડમાં કોરોના વિસ્ફોટ થશે તો જવાબદાર કોણ રહેશે?

મળતી માહિતી પ્રમાણે, આ કમલેશ બારોટના ડાયરામાં બે હજારથી 2500 જેવા લોરો એકઠા થયા હતા. આ કાર્યક્રમ SP ઓફિસથી માત્ર 200 મીટર દૂર થયો હતો. પરંતુ ન તો તંત્રને કે પોલીસને આટલી મોટી ભીડથી કોઇ વાંધો હોય તેવું દેખાતુ ન હતું. લોકો આટલી મોટી સંખ્યામાં ભેગા થયા હતા અને મોટાભાગના લોકોએ માસ્ક પહેર્યા જ ન હતા.

એકતરફ મહિસાગરના લુણાવાડામાં બજારો 15 દિવસ સુધી તંત્ર દ્વારા પોલીસની મદદથી શુક્રવારથી અચાનક બંધ કરાવવામાં આવ્યા હતા. જેથી વેપારીઓ રોષે ભરાયા હતા. લુણાવાડા નગરના બસ સ્ટેશન પાછળ આવેલ બજાર તેમજ બાવળા માર્કેટ બજાર, માંડવી બજાર, પરા બજાર, સુપર માર્કેટ સહિતના મોટાભાગના ગીચવાળા કે જ્યાં મોટા ભાગના લોકો ખરીદી કરવા માટે આવે છે અને વધુ ભીડ જામે છે. તેથી કોરોના ન ફેલાય તે માટે આ બંધ કરાવાવમાં આવ્યા હતા. તો શું તંત્રને આ ડાયરામાં કોરોના નહીં ફેલાય તેવું લાગતું હતું?

થોડા દિવસ પહેલા નિઝર તાલુકાના વેલદા ગામે રહેતા જોગાભાઇ ભીખાભાઇ પાડવીએ એમની પુત્રીના લગ્ન પ્રસંગે રાત્રિના સમયે મોટી મેદની ભેગી કરી હતી. જેમા ડી જેના તાલે નાચ ગાનનું આયોજન કર્યું હતું. જેને લઇ આયોજકો જોગાભાઇ પાડવી અને કોહિનૂર બેન્ડના દિલીપ કોટવાળીયા તથા આશિષ વસાવા સામે ગુનો દાખલ કરી એમની અટક કરી હતી. આ સંદર્ભે તાપી જિલ્લા આરોગ્ય વિભાગ દ્વારા તકેદારીના ભાગરૂપે ગુરુવારે પીએચસીના સ્ટાફ સાથેની ત્રણ ટીમ વેલદા ગામે મોકલવામાં આવી હતી.

આવો જ એક કિસ્સો સુરત જિલ્લાના માંગરોળ તાલુકાના વેરાકૂઈ ગામે પણ બન્યો હતો. જેમાં ગામના હોળી ફળિયામાં પણ લગ્ન પ્રસંગે લોકોના ટોળા એકઠા થયા હોવાનો વીડિયો વાયરલ થઈ રહ્યો હતો. જેમાં ભાજપના કાર્યકર્તા ઇદ્રિશભાઇ મલેકની દીકરીનો લગ્ન પ્રસંગમાં કોવિડ-19ની ગાઈડ લાઈનનો ભંગ થયો હતો. લોકો મોટી સંખ્યામાં એકઠા થઈને ગરબે ઘૂમવાની સાથે સાથે ડાન્સ કરતા પણ જોવા મળ્યાં હતાં. આ કિસ્સામાં પોલીસ હરકતમાં આવી હતી. જે બાદમાં સ્થાનિક PSI અને જમાદારને પણ સસ્પેન્ડ કરવામાં આવ્યાં હતાં.