અમદાવાદમાં લઠ્ઠાકાંડ? બે મિત્રોનાં શંકાસ્પદ હાલતમાં મળ્યા મૃતદેહ, ક્રાઇમ બ્રાંચને સોંપાઇ તપાસ

અમદાવાદમાં ફરી લઠ્ઠાકાંડ થયો હોવાની આશંકા દર્શાવાઇ રહી છે. શહેરના વટવા વિસ્તારમાં આવેલા બીબી તળાવ પાસેથી કાલે રાતે શંકાસ્પદ રીતે બે યુવાનો મૃત હાલતમાં મળી આવ્યા છે. પ્રાથમિક તપાસમાં જાણવા મળ્યું છે કે બન્ને મૃત યુવાનો દારૂ પીધેલી હાલતમાં હતાં. મૃતકનું નામ ફિરોઝ મહોમદ હુસેન (વય- 28 વર્ષ) અને બીજા યુવકનું નામ ઈંઝામુલ ઉર્ફે રાજા ઉંમર (વય- 21 વર્ષ) છે.

આ બંન્ને યુવાનો દાણીલીમડા વિસ્તારના રહેવાસી છે. બંન્નેના મૃતદેહોને હાલ પોસ્ટમોર્ટમ માટે એલજી હોસ્પિટલ લઇ જવામાં આવ્યાં છે. મૃતક યુવાનના મોબાઇલના લાસ્ટ કોલાના આધારે જાણ થઇ કે તેને છેલ્લી વાત દારૂનો ધંધો કરતા માણસ સાથે કરી હતી. પોસ્ટમોર્ટમ થયા પછી જ આ મોત કેમ થયા છે તેની અસલ માહિતી સામે આવશે.

વટવા વિસ્તારના ચુનારા વાસ નજીક પડેલી રિક્ષા પાસેથી આ બે યુવાનોના મૃતદેહો મળી આવ્યાં હતાં. તેઓ મળ્યા ત્યારે બંન્નેના મોઢામાંથી સફેદ રંગનું ફીણ નીકળતું હતું. સારવાર માટે લઇ જતા પહેલા જ બંન્ને યુવકોના મોત નીપજ્યા હતાં. નોંધનીય છે કે આ બંન્ને યુવાનો મિત્રો હતાં.

મોતની જાણ થતાં બંન્ને પરિવારોમાં ગમગીની છવાઇ ગઇ છે. પરિવારો આક્ષેપ કરી રહ્યાં છે કે દારૂ પીધા પછી જ આ લોકોનું મોત નીપજ્યું છે.

તેમના મોત અંગે અનેક તકવિતર્કો સર્જાયા છે. હાલમાં એલ જી હોસ્પિટલ ખાતે તેમના મૃતદેહઓ લવાતા મોટી સંખ્યામાં તેમના પરિજનો દોડી આવ્યા હતા. આ યુવાનોની હત્યાનો મામલો અમદાવાદ ક્રાઈમ બ્રાન્ચને સોંપાઈ છે. ક્રાઇમ ડીસીપી ઝાલા અને ઝોન-6 દ્વારા સમગ્ર મામલે તપાસ હાથ ધરવામાં આવી રહી છે. ફિરોજ અને રાજનું કેમિકલ દવા પીવાથી થયા મોત થયા હતા તેવું રિપોર્ટમાં સામે આવ્યું છે.