20-21 જુલાઇએ દક્ષિણ ગુજરાતમાં ભારે વરસાદની આગાહી, સૌરાષ્ટ્ર-કચ્છમાં શક્યતા ઓછી

વીભુ પટેલ, અમદાવાદ : વરસાદની કાગડોળે રાહ જોઈને બેઠેલા ખેડૂતો માટે સારા સમાચાર છે. આગામી તારીખ 20થી 21 જુલાઇ દરમિયાન દક્ષિણ ગુજરાતમાં સારો વરસાદ પડવાની આગાહી હવામાન વિભાગ તરફથી વ્યક્ત કરવામાં આવી છે. આ સાથે જ સૌરાષ્ટ્ર અને કચ્છમાં પણ સારો વરસાદ પડવાની આગાહી હવામાન વિભાગે આપી છે. (19મી જુલાઈની સેટેલાઇટ તસવીર)

ગુજરાત હવામાન વિભાગના ડિરેક્ટર જયંત સરકારે જણાવ્યું હતું કે, એપર એર સાઇક્લોનિક અસરને પગલે દક્ષિણ ગુજરાત અને ઇસ્ટ સેન્ટ્રલ ગુજરાતમાં આગામી બે દિવસમાં ભારે વરસાદ પડી શકે છે. વલસાડ, નર્મદા, દમણ, છોટાઉદેપુરમાં ભારે વરસાદની આગાહી આપવામાં આવી છે. આ ઉપરાંત સૌરાષ્ટ્ર-કચ્છમાં આગામી પાંચ દિવસ સુધી વરસાદની બહુ સંભાવના વ્યક્ત કરવામાં આવી નથી.

હવામાન વિભાગના જણાવ્યા પ્રમાણે 19મી જુલાઈના રોજ રાજ્યના અમુક વિસ્તારોમાં છૂટોછવાયો વરસાદ પડી શકે છે. જે બાદમાં 20 અને 20 જુલાઈના રોજ દક્ષિણ ગુજરાતના અમુક વિસ્તારોમાં ભારે વરસાદ પડશે. તે પછીના બે દિવસ સુધી વરસાદમાં ઘટાડો જોવા મળશે.

અત્યાર સુધી ગુજરાતમાં સરેરાશ 24 ટકા વરસાદ પડ્યો છે. સામાન્ય રીતે બંગાળની ખાડીમાં ઉભા થતા લો પ્રેશર કે ડીપ ડિપ્રેશનને કારણે ગુજરાતમાં વરસાદ પડતો હોય છે. આ વખતે આ સિસ્ટમ સક્રિય ન થતાં ગુજરાતમાં વરસાદ ન પડી રહ્યો હોવાનું હવામાન વિભાગે જણાવ્યું હતું.