Corona Case: કોરોના કહેર વધતા ગુજરાતનાં બેંક કામદારોમાં ફફડાટ, 60 હજાર કર્મચારીઓના હિતમાં કરાઇ ખાસ માંગ

સંજય ટાંક અમદાવાદ, કોરોનાનું સંક્રમણ (Covid 19 cases in Gujarat)વધતા હાલ રેકોર્ડ બ્રેક કેસો સામે આવી રહ્યા છે. રાજ્યમાં રોજ 21 હજારથી વધુ કોરોનાનાં કેસ સામે આવતા હવે બેંક કર્મચારીઓમાં (Bank Workers) પણ ગભરાટ ફેલાયો છે. બેંક એમ્પ્લોયી યુનિયન દ્વારા બેન્કિંગની કેટલીક કામગીરી મર્યાદિત કરવા સ્ટેટ લેવલ બેન્કર્સ કમિટી સમક્ષ રજૂઆત કરવામાં આવી છે. આ ત્રીજી લહેરમાં (Third Wave) સંક્રમણ વધુ ફેલાઈ રહ્યું છે અને આગામી દિવસોમાં સ્થિતિ વધુ ખરાબ બને તેવી સ્થિતિ છે. તેવામાં બેંકની ઘણી વહીવટી કચેરીઓએ લોકોના પ્રવેશ પર પ્રતિબંધ મૂક્યો છે તો બેંકની બ્રાન્ચમાં પણ કોરોના પોઝિટિવ કેસમાં ઘટાડો ન થાય ત્યાં સુધી  અઠવાડિયામાં 5 દિવસ બેંકો (5 Days week working) રાખવા સહિત વિવિધ રજુઆત કરવામાં આવી છે.

મહાગુજરાત બેંક એમ્પ્લોયી યુનિયનના જનરલ સેક્રેટરી જનક રાવલ દ્વારા સ્ટેટ લેવલ બેન્કર્સ કમિટી (SLBC) સમક્ષ રાજ્યના 60 હજાર જેટલા બેન્ક કર્મચારીઓના હિતમાં કોમન એડવાઇઝરી જાહેર કરવા માંગ કરવામાં આવી છે. આ એડવાઇઝરીમાં બેંકની કામગીરી મર્યાદિત કરવા માંગ કરાઈ છે. જેમાં કોવિડ પોઝિટિવ રેટમાં ઘટાડો થાય ત્યાં સુધી બેંક અઠવાડિયામાં 5 દિવસ ચાલુ રાખવામાં આવે તેવી માંગ કરવામાં આવી છે

તેમજ, સવારે 10.00 થી બપોરના 01.00 વાગ્યા સુધીના વ્યવસાયના કલાકો ઘટાડીને માત્ર આવશ્યક સેવાઓ જ ચાલુ રાખવા તેમજ અન્ય  કામગીરી પ્રતિબંધિત કરીને શાખાઓમાં ભીડ ટાળવી જરૂરી છે.

કર્મચારી કોરોના પોઝિટિવ જણાય તો બેંકોને 48 કલાક માટે શાખા બંધ કરવાની સલાહ આપવા માંગ કરાઈ છે.  આ ઉપરાં બેંકને કર્મચારીઓની ઘટતી સંખ્યા સાથે કામ કરવાની સલાહ આપવા, સગર્ભા મહિલા કર્મચારી અને વિકલાંગ કર્મચારીઓને ઑફિસમાં આવવામાંથી મુક્તિ આપવા કોમન એડવાઇઝરી જાહેર કરવા રજુઆત કરવામાં આવી છે.

મહત્વનું છે કે કોરોનાની બીજી લહેરમાં 15 હજારથી વધુ બેન્ક કર્મચારીઓ કોરોના સંક્રમિત થયા હતા ત્યારે હવે સંક્રમણ વધતા ફરી બેન્ક કર્મચારીઓમાં ફફડાટ ફેલાયો છે.

હાલ SLBC સમક્ષ બેન્ક એમ્પ્લોયી યુનિયન દ્વારા રજુઆત મોકલી આપવામાં આવી છે હોદ્દાની રુએ મુખ્યમંત્રી SLBCના ચેરમેન  છે જેથી જો SLBC દ્વારા આ મામલે ઠરાવ કરવામાં આવે તો કર્મચારીઓની આ રજુઆત પર ઝડપથી નિર્ણય લઈ શકાય.