અમદાવાદથી સ્ટેચ્યૂ ઓફ યુનિટી જવા માટે ઉપડશે બસ, જાણી લો તેની વિગત

અમદાવાદીઓને હવે વિશ્વની સૌથી ઊંચી પ્રતિમા સ્ટેચ્યૂ ઓફ યુનિટી જવા માટે જરા પણ તકલીફ નહીં પડે. ગુજરાત એસટી નિગમે સ્ટેચ્યૂ ઓફ યુનિટી જવા આવવા માટે અમદાવાદનાં રાણીપથી સીધી એસી બસ શરૂ કરવામાં આવી છે.

આ એસી બસનું ભાડું રૂ.304 છે. આ બસ રાણીપથી દરરોજ સવારે 6 વાગે ઉપડશે અને સાંજે 5 વાગે સ્ટેચ્યૂ ઓફ યુનિટીથી પરત ફરશે. આ બસ ગીતામંદિર, સીટીએમ, વડોદરા, ડભોઈ થઈ સ્ટેચ્યૂ ઓફ યુનિટી પહોંચશે.

આ સર્વિસનું ઓનલાઈન તેમજ નિગમની એપ્લિકેશન પ્લે સ્ટોર પર એડવાન્સ બુકિંગ કરાવનારને 6 ટકા તેમજ રિટર્ન બુકિંગ કરાવનારને 10 ટકા ડિસ્કાઉન્ટ મળશે.

થોડા સમય પહેલા જ મુલાકાતીઓનાં ધસારાને જોતા વિશ્વની સૌથી ઊંચી મૂર્તિને જોવાનાં સમયમાં બે કલાકનો વધારો કરવામાં આવ્યો છે. 5મી ફેબ્રુઆરી,2019ના રોજથી બે કલાકનો વધારો કરાયો છે. સમયમાં કરાયેલા ફેરફાર મુજબ સ્ટેચ્યૂ ઓફ યુનિટીની મુલાકાત માટેનો સમય હવે સવારના 8.00થી સાંજના 6.00વાગ્યા સુધી રાખવાનો ચીફ એડમિનીસ્ટ્રેટરશ્રી, સ્ટેચ્યૂ ઓફ યુનિટી, કેવડીયા કોલોની તરફથી નિર્ણય લેવાયો છે.

શનિવાર-રવિવાર તથા જાહેર રજાના દિવસોએ પહેલા 6000 પ્રવાસીઓ વ્યુઇંગ ગેલેરીનો લાભ લઇ શકતા હતા. હવેથી સમયમાં બે કલાકનો વધારો થવાથી દરરોજ 7000 સુધીની સંખ્યામાં પ્રવાસીઓ વ્યુઇંગ ગેલેરીની મુલાકાતનો લાભ લઇ શકશે.

સ્ટેચ્યૂ ઓફ યુનિટીની મુલાકાત લેવા માટે https://www.statueofunity.in/ અથવા https://www.soutickets.in/ પર ઓનલાઇન બૂકિંગ કરાવી શકશો. ટિકિટની કિંમતની વાત કરીએ તો એન્ટ્રી ફી 120 રૂપિયા રાખવામાં આવી છે. 3થી 15 વર્ષના બાળકો માટે ટિકિટ 60 રૂપિયા રાખવામાં આવી છે. આ સિવાય ઓબ્જર્વેશન ડેક વ્યૂથી શાનદાર નજારાનો આનંદ લેવો હોય તો તેના માટે 350 રૂપિયા ચૂકવવા પડશે