અમદાવાદ: એસજી હાઈવે પર દારૂ ભરેલી ટ્રક પલટી, રસ્તા પર થઈ દારૂની રેલમ-છેલ

ગાંધીના ગુજરાતમાં દારૂબંધી છે પરંતુ ગુજરાતના વિવિધ વિસ્તારોમાંથી છાસવારે વિદેશી દારૂ પકડાય છે. બુટલેગરો જાતભાતના આઈડીયા અજમાવી ગુજરાતમાં દારૂ ઘુસાડવાની કોશિસ કરે છે, જેમાંથી કેટલાક ઝડપાય છે, જ્યારે કેટલાક પોલીસને હાથતાળી આપી દારૂની હેરાફેરી કરવામાં સફળ થાય છે. આવી જ રીતે અમદાવાદમાં સફળતાથી દારૂની હેરાફેરી કરવા જઈ રહેલી ટ્રક અકસ્માતનો ભોગ બની અને દારૂની હેરાફેરીની પોલ પોલીસ સામે ખુલ્લી પડી ગઈ છે.

પ્રાપ્ત માહિતી અનુસાર, આજે સાંજના સમયે અમદાવાદમાં એસજી હાઈવે પર પકવાન ચાર રસ્તા પાસે એક દારૂ ભરેલી ટ્રક પલટી મારી ગઈ. ટ્રક પલટી મારતા સંતાડેલો દારૂ લીકેજ થઈ ગયો, અને રસ્તા પર રીતસરની દારૂની રેલમ છેલ થઈ ગઈ.

આ ઘટનાની પોલીસને જાણ થતા પોલીસ ઘટના સ્થળ પર પહોંચી ગઈ. જોકે, પોલીસ પહોંચે તે પહેલા તો, ટ્રક ચાલક રફૂચક્કર થઈ ગયો હતો. રસ્તા પર ટ્રકે પલટી મારતા લોકોના ટોળે ટોળા જોવા ઉમટી પડ્યા હતા, દારૂની રસ્તા પર રેલમછેલ થતા પર દારૂની દુર્ગંધ ફેલાઈ ગઈ છે.

પોલીસ સુત્રો પાસેથી મળતી માહિતી અનુસાર, ટ્રકની તપાસ કરતા તેમાંથી આરસી બુકની નકલ મળી આવી છે. ટ્રકમાં દારૂ સંતાડીને લઈ જવાઈ રહ્યો હતો, પરંતુ ટ્રક પલટી મારી જતા, દારી લીકેજ તઈ ગયો અને સમગ્ર દારૂ રસ્તા પર ઢોળાઈ ગયો છે. હવે ટ્રકના નંબરના આધારે ટ્રક કોની છે તે બાજુ તપાસ હાથ ધરાશે.

આ ઘટના પર અલ્પેશ ઠાકોરે પણ પોતાની પ્રતિક્રિયા આપી છે. અલ્પેશ ઠાકોરે દારૂ ભરેલી ટ્રક પલટી મારી જવાની ઘટના પર રાજ્ય સરકાર અને પોલીસને નિશાના પર લઈ કહ્યું કે, નેતાઓ અને ભ્રષ્ટ પોલીસ અધિકારીઓની મિલીભગતના કારણે ગુજરાતમાં બેરોકટોક દારૂ વેચાય છે. હું સરકારને પુછવા માંગુ છું કે, સરકાર આ મુદ્દે કેમ ચૂપ છે. દારૂબંધી માટે કેમ કામ કરવામાં આટલી આળસ કરે છે. જ્યારે પણ દારૂ પકડાયાની ઘટના સામે આવ્યા ત્યારે જ્યાંથી દારૂ ઘુસાડ્યો હોય ત્યાંથી લઈ જ્યાંથી દારૂ ઝડપાયો હોય ત્યાં સુધીના અધિકારી સામે એક્શન લેવું જોઈએ.