પેપરલીક કૌભાંડ બાદ પરીક્ષાર્થીઓનો વિશ્વાસ ડગ્યો? બે લાખ લોકોએ પરીક્ષા જ ન આપી

ગુજરાતમાં લોકરક્ષકની ભરતીની પરીક્ષા ગઇકાલે સંપન્ન થઇ હતી. નોંધનીય છે કે ગત ડિસેમ્બરમાં આ પરીક્ષાનું પ્રશ્નપત્ર લીક થયું હતું જેમાં અત્યાર સુધી 15 લોકોની ધરપકડ કરી લેવામાં આવી છે.

રાજ્ય પોલીસ ભરતી બોર્ડના પ્રમુખ વિકાસ સહાયએ જણાવ્યું હતું કે બે લાખ પરિક્ષાર્થીઓએ પરીક્ષા જ આપી નથી. તેમણે વધુમાં જણાવ્યું હતું કે લોકરક્ષકદળની પરીક્ષા યોજાઇ હતી જેમાં ગુજરાત રાજ્ય પોલીસ ભરતી બોર્ડ દ્વારા 8.76 લાખ ઉમેદવારોને કોલ લેટરો ઇસ્યું કરવામાં આવ્યા હતા. જે પૈકી કુલ 6.75 લાખ ઉમેદાવારોએ પરીક્ષા આપી હતી. જેથી બે લાખ ઉમેદવારોએ પરીક્ષા આપી ન હતી.

અમદાવાદમાં સોલા બ્રિજ પાસે આવેલી યુટોપિયા સ્કૂલમાં ચાલુ પરીક્ષામાં પેપરના ફોટો પાડી વોટ્સએપ પર જવાબ મંગાવતા ઉમેદવારની સોલા પોલીસે ધરપકડ કરી હતી. પોલીસે આ મામલે વધારે તપાસ હાથ ધરી છે. જ્યારે રાજકોટમાં પણ વર્ગ ખંડમાંથી એક ઉમેદવાર મોબાઇલ સાથે પકડાતા તેમની સામે કાયદેસરની કાર્યવાહી કરવામાં આવશે.

ગઇ કાલે સવારે કુલ 2500 સેન્ટરોમાં પરીક્ષાનું આયોજન કરવામાં આવ્યું હતું. જેમાં સવારે 8 વાગ્યાથી બાયોમેટ્રીક રજિસ્ટ્રેશનની પ્રક્રિયા હાથ ધર્યા બાદ આઇડી પ્રુફ સહિતના પુરાવાની ચકાસણી કરવામાં આવી હતી. ત્યારબાદ સવારે 10.30 વાગ્યાથી પરિક્ષાર્થીઓને વર્ગ ખંડમાં પ્રવેશ આપવામાં આવ્યો હતો. સવારે 11 વાગ્યાથી પરીક્ષા શરુ થઇ હતી.

રાજ્ય પોલીસ ભરતી બોર્ડે એલઆરડીની ભરતીની પરીક્ષામાં કોઇ ગેરરીતી ન થાય તે માટે થ્રી લેયર પોલીસ બંદોબસ્ત ગોઠવવામાં આવ્યો હતો. જેમાં રાજ્યની કુલ 2440 શાળા, કોલેજોમાં 29900 બ્લોકમાં પરીક્ષાની બેઠક વ્યવસ્થા ગોઠવવામાં આવી હતી.

આ ઉપરાંત પરીક્ષાખંડમાં સીસીટીવી કેમેરા ગોઠવવામાં આવ્યા હતા.