વડોદરામાં પૂરની સ્થિતિ : મગરની બીકે લોકો લાકડીઓ લઈ નીકળ્યા

વડોદરામાં 34 ફૂટે વહી રહેલી વિશ્વામિત્રી નદીના પાણી શહેરમાં ઘૂસી જતા નદીના મગરોએ સોસાયટીમાં દેખા દીધી છે. મગરના સોસાયટીમાં દેખાવાના વીડિયો બાદ લોકોમાં ફફડાટ જોવા મળી રહ્યો છે. લોકો વડોદરામાં જીવન જરૂરિયાતની ચીજો લેવા માટે લાકડીઓ લઈને બહાર નીકળી રહ્યાં છે.

વડોદરા શહેરમાં ગઈકાલે વરસાદે 35 વર્ષનો રેકોર્ડ તોડ્યો હતો. એક જ દિવસમાં 18 ઇંચ વરસાદ ખાબકતા શહેર જળબંબાકાર થયું હતું જેના પગલે ઠેર ઠેર પાણી ફરી વળ્યા હતા.

શહેરના નદીકાંઠાના વિસ્તારોમાં મગરનું જોખમ કાયમ રહે છે. છેલ્લે વર્ષ 2014માં વડોદરા શહેરમાં પૂર આવ્યું હતું ત્યારે પણ મગર ઘૂસી આવ્યા હતા.

વિશ્વામિત્રી નદીમાં આજવા સરોવરમાંથી પાણી છોડવામાં આવી રહ્યું છે. હાલ આજવાની સપાટી 211 ફૂટ પર સ્થિર હોવાના અહેવાલો છે, જોકે, શહેરમાંથી પાણી ન ઓસરતા લોકોને હાલાકી પડી રહી છે.

શહેરના કારેલીબાગ, ફતેગંજ, પ્રતાપગંજ, સયાજીગંજ, અકોટા, પોલો ગ્રાઉન્ડ, કાલાઘોડા સહીતના વિસ્તારોમાં વિશ્વામિત્રીના પાણી ફરી વળ્યા છે. ઉલ્લેખનીય છે કે વિશ્વામિત્રી નદીમાં 300 જેટલા મગરો વસવાટ કરે છે અને દર ચોમાસે શહેરમાં ચડી આવે છે, ત્યારે આ પૂરની સ્થિતીમાં વડોદરાવાસીઓ માથે જોખમ તોળાઈ રહ્યું છે.