રાજકોટના 90 વર્ષના દાદીની વીરતા વાંચીને યાદ આવી જશે ચારણ કન્યા

Rajkot news:  અંકિત પોપટ, રાજકોટ : રાષ્ટ્રીય શાયર ઝવેરચંદ મેઘાણી (Zaverchand Meghani) દ્વારા રચિત ચૌદ વર્ષની ચારણ કન્યાનું (Charan kanya) કાવ્ય આજ સુધી લોક જિહવે રમતું નજરે પડે છે. ત્યારે રાજકોટના 90 વર્ષના મખીબેન નામના દાદીની વીરતાને જોતા રાષ્ટ્રીય શાયર ઝવેરચંદ મેઘાણી રચિત ચૌદ વર્ષની ચારણ કન્યાની કવિતા યાદ આવી જાય છે.

આપણે ત્યાં વર્ષોથી એક વાત કહેવાતી આવી છે કે, જનની જણ તો જણજે કા ભગત કા શૂરવીર, નહિ તો રહેજે વાંઝણી મત ગુમાવીશ નૂર. રાજકોટ શહેરમાં અવારનવાર ગુનાખોરીના બનાવ બનતો હોવાનું સામે આવે છે. ચોરી, લૂંટફાટ, હત્યા, હત્યાનો પ્રયાસ, દારૂ, જુગાર સહિતના ગુનાઓ બનતા હોવાનું વારંવાર સામે આવ્યા છે.

ત્યારે રાજકોટ શહેરના ઇન્ડસ્ટ્રીયલ એરીયા એવા અટિકા વિસ્તારમાં રહેતા મખીબેન નામના 90 વર્ષીય દાદીમાં આજે પણ પોતાના બે હાથમાં તલવાર સમણે છે. તેમજ લાકડી લઇને આવનાર આવારા તત્વોને પણ ભગાડે છે.

થોડા દિવસો પૂર્વે મખીબેનના આ વિસ્તારમાં આવેલી એક પાનની દુકાને બે જેટલા યુવાનો નશો કરેલી હાલતમાં ઘસી આવ્યા હતા. નશો કરેલી હાલતમાં આવી પાનની દુકાનવાળા વ્યક્તિ સાથે અભદ્ર ભાષાનો પ્રયોગ કરી માથાકૂટ કરવા લાગ્યા હતા. સમગ્ર બાબતની જાણ 90 વર્ષીય મખી બેનને થતાં તેઓ લાકડી લઈને તેની દુકાને પહોંચ્યા હતા અને બંને નશા કરેલા શખ્સોને ત્યાંથી ભગાડયા હતા.

મખી બેનનું કહેવું છે કે, મારા વિસ્તારમાં કોઈપણ અસામાજિક તત્વો દેખાય તો તેને હું ખદેડવાનું કામ કરું છું. આજે જ્યારે યુવાનો નશામાં અવારનવાર ચૂર જોવા મળે છે. ત્યારે મખીબેન નામના 90 વર્ષના દાદીમાં યુવાનોને શરમાવે તેવો જોશ જોવા મળે છે. આ તકે મખીબેનનું ઉદાહરણ જોઈ યુવાનો ગેરકાયદે પ્રવૃત્તિ છોડી દેશના વિકાસમાં પોતાનું યોગદાન આપે તે જરૂરી છે.