મોરબી : બાઇકના સ્ટંટ કરી વીડિયો વાયરલ કરનારને ગણતરીની કલાકોમાં પકડી પાડ્યા, 15 વિરુદ્ધ કાર્યવાહી

અતુલ જોશી, મોરબી : મોરબીનાં જાહેર માર્ગ પર બાઈક અને મોપેડ ગેંગ દ્વારા સ્ટંટ કરીને કોહરામ મચાવવામાં આવી રહ્યો હતો અને જાહેર માર્ગો પર નીકળતા લોકોને નુકસાન પહોંચે એ રીતે સ્ટંટ કરી વીડિયો બનાવી જુદી જુદી એપ્લિકેશન મારફતે સોશિયલ મીડિયામાં વાયરલ કરવામાં આવ્યા હતા. આ વીડિયોના સમાચાર ન્યૂઝ 18 ગુજરાતીમાં પ્રસારિત કરવામાં આવ્યા હતા. જેના પગલે મોરબી એસપી એસ. આર. ઓડેદરા અને ડીવાયએસપી રાધિકા ભારાઈ દ્વારા બાઈક ચાલકોની ભાળ મેળવવા સૂચના આપી હતી.

આ પછી પોલીસની ટીમે યુવાનોની શોધખોળ હાથ ધરી હતી. જેમાં સ્ટંટબાજ વીડિયો બનાવનારા મોરબીના પંચાસર રોડ નજીક વિસ્તારમાં રહેતા ધનરાજ શાંતુભા મકવાણા અને અવેશ તૈયબભાઈ સામતાણી હોવાનું બહાર આવ્યુ હતું. જે બાદ મોરબી એ ડિવિઝન સ્ટાફે ધનરાજ શાંતુભા મકવાણા અને અવેશ તૈયબભાઈ સામતાણીની ધરપકડ કરી બન્ને વિરુદ્ધ આઈપીસીની કલમ 177, 184 મુજબ ગુનો નોંધ્યો હતો.

આ સિવાય અન્ય લોકોને નુકસાન પહોંચે એ રીતે જોખમ રૂપે ચલાવતા પંદર જેટલા બાઈકચાલકો વિરુદ્ધ કડક કાર્યવાહી કરી શાન ઠેકાણે લાવી હતી.

આ સિવાય મોરબી પોલીસ દ્વારા આવા કૃત્યો કરતા ઈસમો ક્યાંય નજરે પડે તો મોરબી જીલ્લા કન્ટ્રોલ રૂમના નંબર 02822 243480 અને 74339 85943 મોબાઈલ પર સંપર્ક કરવા પણ લોકોને અપીલ છે. આ માહિતી આપનાર ના નામ અને ઓળખ ગુપ્ત રાખવામાં આવશે તેવું પણ મોરબી એસપી એસ આર ઓડેદરાએ જણાવ્યું છે.