અતિવૃષ્ટિથી મોરબી જીલ્લામાં ખેડૂતો પાયમાલ, હળવદના ખેડૂતે તલનો પાક પશુઓને ખવડાવી દીધો

અતુલ જોશી : મોરબી જીલ્લામાં જગતના તાતની મુશ્કેલીઓ વધી રહી છે. અતિવૃષ્ટિના કારણે ખેડૂતોના ઉભા પાક બર્બાદ થઈ ગયા છે. સર્વે બાદ હજુ સુધી વીમો પણ ન મળતા ખેડૂતો મુશ્કેલીમાં મુકાઇ ગયા છે. હળવદના ખેડુતને તલના પાકમાં નુકસાની જતા ઉભા તલમાં માલઢોર મુકી દીધા હતા. તલના પાકમાં નુકશાની જતા ઉભો પાક ગાય અને ભેસને ખવડાવી દીધો હતો.

ભારે વરસાદ કારણે ખેડુતોએ કરેલો બધા ખર્ચ પાણીમા ગયો છે. વાવેતર જેટલો જ ખર્ચ પણ નીકળતો નથી. ખેડૂતોએ પાકને પશુઓના હવાલે કરી તેને ખવડાવી દેવાનું ઉત્તમ માન્યું છે.

મોરબી તાલુકાનાં અને માળીયા મી.તાલુકામાં પણ ખેડૂતોને ધાર્યું ફળ ન મળતા જગતના તાતના હાલ બેહાલ છે. કપાસના ભાવ આ વર્ષે સારા છે પણ કપાસ નથી.

સરકાર દ્વારા સર્વે હાથ ધરવામાં આવ્યો છે પણ આ સર્વે ક્યારે પૂરો થાય અને કયારે તે વીમાની રકમ આવે એ કહેવું ઘણું જ મુશ્કેલ છે. હાલ મોરબી જીલ્લામાં ખેડૂતોના મોટાભાગના પાક પાણીમાં વહી ગયા છે.